തിരുവനന്തപുരം: ശബരിമല തീര്‍ഥാടനവുമായി ബന്ധപ്പെട്ട് അടിയന്തര സാഹചര്യങ്ങള്‍ നേരിടുന്നതിന് വിവിധ വകുപ്പുകളുടെ ഏകോപനത്തിനായി പമ്പയില്‍ ഒരു എമര്‍ജന്‍സി ഓപ്പറേഷന്‍സ് സെന്റര്‍ ഏര്‍പ്പെടുത്തി. മണ്ഡലമകര വിളക്ക് തീര്‍ഥാടനത്തിന് മുന്നോടിയായി റവന്യൂ, ദുരന്ത നിവാരണ വകുപ്പുകളുടെ നേതൃത്വത്തിലുള്ള സുരക്ഷാ ക്രമീകരണങ്ങള്‍ മന്ത്രി ഇ. ചന്ദ്രശേഖരന്റെ ചേംബറില്‍ ചേര്‍ന്ന യോഗം വിലയിരുത്തി.
തീര്‍ഥാടകരുടെയും തീര്‍ഥാടന കേന്ദ്രത്തിന്റെയും സുരക്ഷയ്ക്കായി വിപുലമായ ക്രമീകരണങ്ങളാണുള്ളത്. എമര്‍ജന്‍സി ഓപ്പറേഷന്‍സ് സെന്ററിന്റെ ഉദ്ഘാടനം ഇന്ന് വൈകിട്ട് നാലിന് റവന്യൂമന്ത്രി നിര്‍വഹിക്കും. മകരവിളക്ക് സമയത്ത് വയര്‍ലസ്, ഹോട്ട്‌ലൈന്‍, ഇന്റര്‍നെറ്റ്, ഹാം റേഡിയോ എന്നീ സംവിധാനങ്ങള്‍ വിവിധ കലക്ടറേറ്റുകള്‍, സന്നിധാനം, പമ്പ, നിലയ്ക്കല്‍, റാന്നി എന്നിവിടങ്ങളില്‍ ബന്ധിപ്പിച്ച് ഈ സെന്ററില്‍ നിന്ന്  ആശയവിനിമയ ശൃംഖല പ്രവര്‍ത്തനക്ഷമമാക്കാനാകും. സെന്ററില്‍ വിവിധ വകുപ്പുകളുടെ ഉദ്യോഗസ്ഥര്‍ ഉണ്ടായിരിക്കും. തീര്‍ഥാടന കാലയളവില്‍ കലക്ടറേറ്റ്, താലൂക്ക് ഓഫിസുകള്‍ എന്നിവിടങ്ങളില്‍ കണ്‍ട്രോള്‍ റൂമുകള്‍ പ്രവര്‍ത്തിക്കും. പുല്ലുമേട് ദുരന്ത സമയത്ത് വെളിച്ചക്കുറവ് രക്ഷാപ്രവര്‍ത്തനത്തെ കാര്യമായി ബാധിച്ച സാഹചര്യം കണക്കിലെടുത്ത് 65ഓളം ആസ്‌ക ലൈറ്റുകള്‍ തന്ത്രപ്രധാന പോയിന്റുകളില്‍ സ്ഥാപിച്ചിട്ടുണ്ട്.
വൈദ്യുതി വിതരണം തടസപ്പെട്ടാലും വെളിച്ചക്കുറവ് ഉണ്ടാകില്ല. വെടിമരുന്ന്, ഇന്ധനങ്ങള്‍, മറ്റു അപകടസാധ്യതയുള്ള സാമഗ്രികള്‍ എന്നിവയുടെ ഉപയോഗവും സംഭരണവും കര്‍ശനമായ സുരക്ഷാ വ്യവസ്ഥകള്‍ക്ക് വിധേയമായേ നടക്കുന്നുള്ളൂ എന്ന് ബന്ധപ്പെട്ട വകുപ്പുകളും കലക്ടര്‍മാരും ഉറപ്പ് വരുത്താന്‍ നിര്‍ദേശം നല്‍കി.  വിവിധ സ്ഥലങ്ങളിലുള്ള മകരവിളക്ക് വ്യൂ പോയിന്റുകളില്‍ സുരക്ഷാ ബാരിക്കേഡുകള്‍ നിര്‍മിക്കാന്‍ നിര്‍ദേശിച്ചിട്ടുമുണ്ട്.