ചങ്ങരംകുളം: ഇരു വിഭാഗങ്ങള്‍ തമ്മിലുണ്ടായ സംഘര്‍ഷത്തില്‍ ഇരുപതോളം പേര്‍ക്കെതിരേ ചങ്ങരംകുളം പൊലിസ് കേസെടുത്തു. തിങ്കളാഴ്ച രാത്രി എട്ടോടെ ചങ്ങരംകുളത്ത് ഇരു വിഭാഗങ്ങള്‍ തമ്മില്‍ നടന്ന സംഘര്‍ഷത്തില്‍ രണ്ടു പേര്‍ക്ക് പരുക്കേറ്റിരുന്നു.
പരുക്കേറ്റ ചിയ്യാനൂര്‍ സ്വദേശി അബ്ദുല്‍ ഹയ്യി (30) നെ എടപ്പാള്‍ ആശുപത്രിയിലും കിഴിക്കര സ്വദേശി റാഷിദി (22)നെ ചങ്ങരംകുളത്തെ സ്വകാര്യ ആശുപത്രിയിലും പ്രവേശിപ്പിച്ചിരുന്നു. സംഭവത്തില്‍ റാഷിദിന്റെ പരാതി പ്രകാരമാണ് കേസ്.
ഞായറാഴ്ച വൈകിട്ട് എട്ടരയോടെ ചിയ്യാനൂര്‍ പാടത്തുവച്ച് ഓട്ടോ ഡ്രൈവര്‍ സിഗ്‌നല്‍ നല്‍കാതെ റോഡ് ക്രോസ് ചെയ്‌തെന്നാരോപിച്ച് ബൈക്കില്‍ വന്ന സംഘം ഓട്ടോ ഡ്രൈവറുമായി സംഘര്‍ഷമുണ്ടായിരുന്നു. തുടര്‍ന്ന് ഇരുകൂട്ടരുടെയും സുഹൃത്തുക്കള്‍ തമ്മിലും സംഘര്‍ഷമുണ്ടായി. കഴിഞ്ഞ ദിവസം ചങ്ങരംകുളം പൊലിസ് സ്റ്റേഷനില്‍വച്ചു പ്രശ്‌നങ്ങള്‍ ഒത്തുതീര്‍ക്കുകയും ചെയ്തിരുന്നു. എന്നാല്‍ തിങ്കളാഴ്ച രാത്രിയോടെ വീണ്ടും ചങ്ങരംകുളം ഹൈവേയില്‍വച്ച് ഇരു വിഭാഗങ്ങളും ഏറ്റുമുട്ടുകയായിരുന്നു.