കൊടുവായൂര്‍: നോട്ടുകള്‍ മാറികിട്ടിയില്ല. നെല്‍പാടങ്ങളില്‍ നടീല്‍ നിര്‍ത്തിവെക്കുന്നു. പുതുനഗരം, കൊടുവായൂര്‍, പട്ടഞ്ചേരി എന്നീ പഞ്ചായത്തുകളിലാണ് കുഴല്‍കിണറിലെ വെള്ളം ഉപയോഗിച്ച് ഞാറ്റടികള്‍ തയ്യാറാക്കിയ പാടങ്ങളില്‍ ഞാറു നടീല്‍ നിര്‍ത്തിവെച്ചത്.
തൊഴിലാളികള്‍ക്ക് കൂലിനല്‍കുന്നതിനുള്ള പണം കൈവശമില്ലാത്തതാണ് താല്‍ക്കാലികമായി പണം ലഭിക്കുന്നതുവരെ നടീല്‍ മാറ്റിവച്ചതെന്ന് വണ്ടിത്താവളത്തിലെ നെല്‍ കര്‍ഷകര്‍ പറയുന്നു.
ബാങ്കുകളില്‍പോയി കാത്തുനിന്നുലഭിച്ച് പണം ഉപയോഗിച്ച് ഉഴുതുമറിച്ചെങ്കിലും വീണ്ടും പോയി നില്‍ക്കുവാനുള്ള സാവകാശം കര്‍ഷകര്‍ക്ക് ലഭിക്കാത്തതും പണം കൈമാറുന്നതിന് നിശ്ചിത തുകയുടെ പരിധി ഉള്ളതിനാലുമാണ് നടീല്‍ താല്‍കാലികമായി നിര്‍ത്തിവെച്ചിട്ടുള്ളതെന്ന് വണ്ടിത്താവളം അലയാറിലെ കര്‍ഷകനായ രാമന്‍ പറയുന്നു.
ഇത്തരത്തില്‍ വിവിധ പഞ്ചായത്തുകളില്‍ കര്‍ഷകതൊഴിലാളികള്‍ക്ക് കൂലിനല്‍കാനില്ലാത്തതിന്റെ പേരില്‍ നെല്‍കൃഷിക്ക് പുറമെ മറ്റു കൃഷിപണികളും മുടങ്ങിയിരിക്കുകയാണ്.