കൊച്ചി: വ്യവസായിയെ തട്ടികൊണ്ട് പോയി ഭീഷണിപ്പെടുത്തിയ കേസില്‍ ഒളിവിലായിരുന്ന സി.പി.എം നേതാവ് സക്കീര്‍ ഹുസൈന്‍ കീഴടങ്ങി. രാവിലെ കമ്മിഷണര്‍ ഓഫിസില്‍ രഹസ്യമായി എത്തി കീഴടങ്ങുകയായിരുന്നു. ഹൈക്കോടതി മുന്‍കൂര്‍ ജാമ്യാപേക്ഷ തള്ളിയ സാഹചര്യത്തിലാണ് കീഴടങ്ങല്‍. മാധ്യമങ്ങളുടെ കണ്ണു വെട്ടിച്ചാണ് സക്കീര്‍ കൊച്ചി കമ്മീഷണര്‍ ഓഫീസിലെത്തിയത്.

സി.പി.എം കളമശേരി മുന്‍ ഏരിയ സെക്രട്ടറിയാണ് സക്കീര്‍ ഹുസൈന്‍. ഒരാഴ്ചയ്ക്കുള്ളില്‍ അന്വേഷണ ഉദ്യോഗസ്ഥനു മുന്‍പില്‍ ഹാജരാകാനാണ് ജാമ്യാപേക്ഷ തള്ളിക്കൊണ്ട് ഹൈക്കോടതി സക്കീര്‍ ഹുസൈന് നിര്‍ദേശം നല്‍കിയത്. 

എറണാകുളം സ്വദേശിയായ വ്യവസായി ജൂബി പൗലോസിന്റെ പരാതിയിലാണ് സക്കീറിനെതിരേ പൊലിസ് കേസെടുത്തിരിക്കുന്നത്.