കോഴിക്കോട്: നേര്‍ത്തും പെരുത്തും പെയ്യുന്ന മഴയുടെ ഭംഗിയും താളവും ആസ്വാദകരിലേക്ക്. യുവ പിന്നണി ഗായകന്‍ കെ.കെ നിഷാദും സുഹൃത്തുക്കളും ചേര്‍ന്നാണ് മഴ പ്രമേയമാക്കി സംഗീത ആല്‍ബം ഒരുക്കിയിരിക്കുന്നത്. 'ബര്‍ഖാ ഋതു' എന്നു പേരിട്ടിരിക്കുന്ന ആല്‍ബത്തിന്റെ റിലീസിങ് 23നു വൈകിട്ട് ആറിനു ടാഗോര്‍ സെന്റനറി ഹാളില്‍ നടക്കും.
പരമ്പരാഗത ഹിന്ദുസ്ഥാനി ശൈലിയിലുള്ള ഒറ്റ ഗാനമാണ് ആല്‍ബത്തിലുള്ളത്. അഞ്ചര മിനിട്ടാണ് ദൈര്‍ഘ്യം. സംഗീത പ്രേമികള്‍ ഏറെ ഇഷ്ടപ്പെടുന്ന മേഘ് രാഗത്തില്‍ ചിട്ടപ്പെടുത്തിയ ബന്ദിഷാണിത്. മഴയുടെ സര്‍വഭാവങ്ങളും നിറയുന്ന നൃത്തം പശ്ചാത്തലമാക്കിയാണ് ആല്‍ബം ദൃശ്യവല്‍ക്കരിച്ചിരിക്കുന്നത്. നാട്യരംഗത്ത് ശ്രദ്ധേയരായ ടീം സമുദ്രയുടെ അമരക്കാരായ മധു ഗോപിനാഥും സജീവ് വക്കവും ചേര്‍ന്നു ചിട്ടപ്പെടുത്തിയതാണ് ഇതിലെ നൃത്തരംഗങ്ങള്‍. റിലീസിങ് ചടങ്ങിനു ശേഷം നിഷാദിന്റെയും സഹോദരി ആതിര കൃഷ്ണന്റെയും നേതൃത്വത്തിലുള്ള ഗാനസന്ധ്യയും അരങ്ങേറും.