മലപ്പുറം:  നിയമസഭയില്‍ മലപ്പുറം മണ്ഡലക്കാരായി ഇനിമുതല്‍ നാലുപേരുണ്ടാവും. മലപ്പുറം മണ്ഡലത്തില്‍ നിന്ന് വിജയിച്ച പി ഉബൈദുള്ളയെ കൂടാതെ ജില്ലയിലെ മറ്റുമണ്ഡലങ്ങില്‍ മത്സരിച്ച മൂന്നുപേരാണു മലപ്പുറം മണ്ഡലത്തില്‍ താമസക്കാരായി ഉള്ളത്. ജില്ലയില്‍ ലീഗിന്റെ മൂന്ന് എം.എല്‍.എമാരും കോണ്‍ഗ്രസിലെ ഒരു എം.എല്‍.എയുമാണ് മലപ്പുറം മണ്ഡലത്തിലെ താമസക്കാര്‍.
വേങ്ങര മണ്ഡലത്തില്‍ നിന്ന് ജില്ലയിലെ മികച്ച ഭൂരിപക്ഷത്തോടെ വിജയിച്ച പികെ കുഞ്ഞാലിക്കുട്ടി മലപ്പുറം നഗരസഭയിലെ പാണക്കാട് കാരാത്തോട് സ്വദേശിയാണ്. നഗരസഭയിലെ മുണ്ടുപറമ്പ് സ്വദേശിയായ അക്കപ്പുരക്കല്‍ വീട്ടില്‍ എ.പി അനില്‍ കുമാര്‍ വണ്ടൂര്‍ മണ്ഡലത്തില്‍ നിന്നും വള്ളുവമ്പ്രം അത്താണിക്കല്‍ സ്വദേശി ടി.വി ഇബ്രാഹീം കൊണ്ടോട്ടി മണ്ഡലത്തില്‍ നിന്നും ജയിച്ചു.
മണ്ഡലത്തിലെ സിറ്റിങ് എം.എല്‍.എ പി. ഉബൈദുള്ള ആനക്കയം സ്വദേശിയാണ്. കഴിഞ്ഞ തവണ സംസ്ഥാനത്തെ ഏറ്റവും വലിയ ഭൂരിപക്ഷത്തോടെ നിയമസഭയില്‍ എത്തിയ ഉബൈദുള്ളക്ക് ഇത്തവണ ഭൂരിപക്ഷത്തില്‍ അല്‍പം കുറവു വന്നെങ്കിലും മികച്ചവിജയമാണ് നേടാനായത്.