വാടാനപ്പള്ളി: കര്‍ഷകര്‍ സ്വന്തം ആവശ്യങ്ങള്‍ക്ക് കൃഷി ചെയ്യുന്ന കാര്‍ഷിക വിളകള്‍ ഉപയോഗം കഴിഞ്ഞ് അധികം വരുന്നവ വില്‍ക്കുവാനും ഒപ്പം വാങ്ങുവാനും തളിക്കുളത്ത് ഹരിതസമൃദ്ധി സൊസൈറ്റിയുടെ കീഴില്‍ കേന്ദ്രം തുറക്കപ്പെടുന്നു. 'നാട്ടുപച്ച' എന്ന പേരില്‍ തളിക്കുളം സെന്റര്‍ ബീച്ച് റോഡിലാണ് കര്‍ഷകരുടെ കൂട്ടായ്മയുടെ ഭാഗമായി പുതിയ സംരംഭം തുടങ്ങുന്നത്. ചലചിത്ര താരം ശ്രീനിവാസന്‍ ഞായറാഴ്ച രാവിലെ 9 മണിക്ക് ഉദ്ഘാടനം ചെയ്യും. തളിക്കുളം പഞ്ചായത്തില്‍ തുടങ്ങിയ ഹരിത സമൃദ്ധിയിലെ 200 വനിതാ കര്‍ഷകര്‍ക്ക് പുറമേ ഏത് പ്രദേശത്തേയും കൃഷിക്കാര്‍ക്ക് അവരുടെ വീടുകളില്‍ ഉല്‍പാദിപ്പിക്കുന്ന രാസവളങ്ങളും രാസ കീടനാശിനിയും ഉപയോഗിക്കാത്ത ഏത് കാര്‍ഷിക വിളകളും 'നാട്ടുപച്ചയില്‍ സ്വീകരിക്കും. നാടന്‍ കോഴിമുട്ടകള്‍, തേന്‍, കുടംപുളി, തുടങ്ങിയവയും തവിട് കളയാത്ത അരി, ഓര്‍ഗാനിക് സര്‍ട്ടിഫിക്കേഷനുള്ള മറ്റ് ഭക്ഷ്യോല്‍പ്പന്നങ്ങളും ഇവിടെ ലഭ്യമാകുന്നുണ്ട്. ജൈവ കൃഷിക്കാര്‍ക്ക് കാര്‍ഷിക വിളകള്‍ക്ക് പണം അപ്പപ്പോള്‍ നല്‍കുന്നതിന് സംവിധാനം ഒരുക്കുന്നുണ്ട്. തളിക്കുളം പഞ്ചായത്തിന് പുറമേയുള്ള കൃഷിക്കാര്‍ അവരുടെ വിളകള്‍ രാസവള കീടനാശിനി ഉപയോഗിക്കാതെ ഉല്‍പാദിപ്പിച്ചതാണെന്ന് അതാത് കൃഷി ഓഫീസര്‍മാരുടെ സര്‍ട്ടിഫിക്കറ്റ് ഹാജരാക്കണം. തളിക്കുളത്തെ കൃഷിയിടങ്ങള്‍ വാര്‍ഡ് തല ഹരിതസമൃദ്ധി അംഗങ്ങള്‍ പരിശോധിക്കുന്നുണ്ട്. ജൈവ കര്‍ഷകര്‍ ആവുന്നതിന് ഹരിത സമൃദ്ധിയില്‍ പേര് രജിസ്റ്റര്‍ ചെയ്യുന്നതിന് സൗകര്യം ഒരുക്കുന്നുണ്ടെന്ന് പ്രസിഡന്റ് പി.എസ് സുല്‍ഫീക്കര്‍, സെക്രട്ടറി ഹിറോഷ് ത്രിവേണി, ട്രഷറര്‍ മുഹമ്മദ് പതിയാപറമ്പത്ത് അറിയിച്ചു.