കല്‍പ്പറ്റ: 53മത് സംസ്ഥാന സീനിയര്‍ ഫുട്‌ബോള്‍ ചാംപ്യന്‍ഷിപ്പ് ഈ മാസം 22 മുതല്‍ വയനാട്ടില്‍ ആരംഭിക്കും. മേപ്പാടി-അരപ്പറ്റ എച്ച്.എം.എല്‍ സ്റ്റേഡിയത്തിലാണ് മത്സരം.  ചാംപ്യന്‍ഷിപ്പിലെ മികച്ച താരങ്ങളെ തിരഞ്ഞെടുത്താണ് സംസ്ഥാന സന്തോഷ് ട്രോഫി ടീം ഒരുക്കുക. ഏഴു ടീമുകള്‍ ഉള്‍പെടുന്ന രണ്ടു ഗ്രൂപ്പുകളായാണ് മത്സരം. കോട്ടയം, കോഴിക്കോട്, ഇടുക്കി, മലപ്പുറം, കണ്ണൂര്‍, തിരുവനന്തപുരം, പാലക്കാട് ടീമുകള്‍ ഗ്രൂപ്പ് എയിലും വയനാട്, പത്തനംതിട്ട, എറണാകുളം, ആലപ്പുഴ, തൃശ്ശൂര്‍, കൊല്ലം, കാസര്‍കോട് ജില്ലകള്‍ ഗ്രൂപ്പ് ബിയിലും ഏറ്റുമുട്ടും. 22നു നടക്കുന്ന ആദ്യ മത്സരത്തില്‍ തിരുവനന്തപുരം പാലക്കാടിനെ നേരിടും. ഉച്ചക്കു രണ്ടിനും വൈകിട്ട് നാലിനുമാണ് മത്സരങ്ങള്‍. കാസര്‍കോടാണ് നിലവിലെ ചാംപ്യന്‍മാര്‍.