കോഴിക്കോട്: ബാല്യ കൗമാരങ്ങളുടെ കായികമികവ് മാറ്റുരക്കുന്ന 15 ാം ജില്ലാ സ്‌കൂള്‍ കായികമേളക്കു നാളെ കൊടിയേറും. മെഡിക്കല്‍ കോളജ് ഒളിംപ്യന്‍ റഹ്മാന്‍ സ്റ്റേഡിയത്തില്‍ നടക്കുന്ന കായികമേള ഉച്ചയ്ക്ക് 2.30നു ജില്ലാപഞ്ചായത്ത് പ്രസിഡന്റ് ബാബു പറശ്ശേരി ഉദ്ഘാടനം ചെയ്യും.
നോട്ട് നിരോധനത്തെ തുടര്‍ന്നുണ്ടായ പ്രശ്‌നംമൂലം മുന്‍ വര്‍ഷങ്ങളില്‍ നിന്നും വിത്യസ്തമായി കടുത്ത സാമ്പത്തിക പ്രതിസന്ധിക്കിടെയാണ് ഇത്തവണ മീറ്റ് നടക്കുന്നത്. പ്രതിസന്ധിക്കിടയിലും വിവിധ സംഘാടക സമിതികള്‍ ചേര്‍ന്ന് മേള വിജയിപ്പിക്കുന്നതിനുള്ള ഒരുക്കങ്ങള്‍ അവസാന ഘട്ടത്തിലെത്തിയതായി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.
മത്സരത്തിന്റെ രജിസ്‌ട്രേഷന്‍ ഇന്നു വൈകിട്ട് മൂന്നു മുതല്‍ കാംപസ് ഹൈസ്‌കൂളില്‍ ആരംഭിക്കും. സബ്ജൂനിയര്‍, ജൂനിയര്‍, സീനിയര്‍ വിഭാഗങ്ങളിലായി 17 ഉപജില്ലകളില്‍ നിന്നും യോഗ്യത നേടിയ 2960 താരങ്ങള്‍ 108 ഇനങ്ങളില്‍ മത്സരിക്കും. മേള ബുധനാഴ്ച സമാപിക്കും. സമാപന ചടങ്ങില്‍ ഒളിംപ്യന്‍ പി.ടി ഉഷ മുഖ്യാതിഥിയാകും. ജില്ലാപഞ്ചായത്ത് വിദ്യാഭ്യാസ സ്റ്റാന്റിങ് കമ്മറ്റി ചെയര്‍മാന്‍ മുക്കം മുഹമ്മദ് സമ്മാനദാനം നിര്‍വഹിക്കും. വാര്‍ത്താസമ്മേളനത്തില്‍ സ്വാഗതസംഘം ചെയര്‍മാന്‍ കമാല്‍ വരദൂര്‍, വൈസ് ചെയര്‍മാന്‍ ഷെറീന വിജയന്‍, കണ്‍വീനര്‍ പി. അശോകന്‍, മീഡിയ കണ്‍വീനര്‍ സനോജ് സംബന്ധിച്ചു.