മണ്ണാര്‍ക്കാട്: മോഷ്ടിച്ച ബൈക്കുമായി സഞ്ചരിക്കവെ യുവാവ് പൊലിസ് പിടിയിലായി. കൊഴിഞ്ഞാമ്പാറ സ്വദേശി തന്‍സീറി (20) നെയാണ് മണ്ണാര്‍ക്കാട് പൊലീസ് പിടികൂടിയത്. കഴിഞ്ഞ ദിവസം പുലര്‍ച്ചെ 2.15ഓടെ ചിരക്കല്‍പ്പടിയില്‍ വാഹന പരിശോധനക്കിടെയാണ് മോഷ്ടാവ് പിടിയിലാവുന്നത്. പാലക്കാട് സ്റ്റേഡിയം ബസ് സ്റ്റാന്റിന് സമീപത്ത് നിന്നും മോഷ്ടിച്ച ബൈക്കുമായി മണ്ണാര്‍ക്കാട് ഭാഗത്തേക്ക് വരുന്നതിനിടെയാണ് തന്‍സീര്‍ പിടിയിലാവുന്നത്. യാത്രക്കിടെ ഒലവക്കോട് പളളിയില്‍ നിന്നും മോഷ്ടിച്ചതായി പറയുന്ന മൊബൈലും, പേഴ്‌സും പ്രതിയില്‍ നിന്നും കണ്ടെടുത്തിട്ടുണ്ട്. തന്‍സീറിന് ജില്ലയിലെ കഞ്ചിക്കോട്, പാലക്കാട്, മീനാക്ഷിപുരം സ്റ്റേഷനുകളില്‍ സമാനമായ കേസുകളുണ്ടെന്ന് പൊലീസ് പറഞ്ഞു. എസ്.ഐ ഷിജു.കെ എബ്രഹാം, അഡീ.എസ്.ഐ രാധാകൃഷ്ണന്‍, സീനിയര്‍ സി.പി.ഒ ജിനേഷ് ബാബു, സി.പി.ഒമാരായ ഷാഫി, റഫീക്ക്, രാംകുമാര്‍ തുടങ്ങിയവരുടെ നേതൃത്വത്തിലുളള സംഘമാണ് പ്രതിയെ പിടികൂടിയത്. മണ്ണാര്‍ക്കാട് കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു.