കാഞ്ഞിരംകുളം: മോഷ്ടിച്ച ബൈക്കുമായി രണ്ടു യുവാക്കളെ ഇന്നലെ കാഞ്ഞിരംകുളം പൊലിസ് അറസ്റ്റ് ചെയ്തു. തിരുവല്ലം പാലത്തിനു സമീപം ജാസ്മിന്‍ മന്‍സിലില്‍ ഇമ്രാന്‍ (20) , നെയ്യാറ്റിന്‍കര ടി.ബി ജങ്ഷനില്‍ സബീര്‍ മന്‍സിലില്‍ മാഹീന്‍ അബൂബക്കര്‍ (19) എന്നിവരാണ് പിടിയിലായത്.
അമിത വേഗത്തില്‍ രണ്ട് യുവാക്കള്‍ ബൈക്കില്‍ കാഞ്ഞിരംകുളം ഭാഗത്തേയ്ക്ക് വരുന്നതായി പൂവാര്‍ പൊലിസ് കാഞ്ഞിരംകുളം പൊലിസിന് സന്ദേശം നല്‍കിയിരുന്നു. തുടര്‍ന്ന് കാഞ്ഞിരംകുളത്തു വെച്ച് പൊലിസ് ബൈക്കിന് കാണി കാണിച്ചപ്പോള്‍ യുവാക്കള്‍ ബൈക്ക് ഉപേക്ഷിച്ച് ഓടാന്‍ ശ്രമിച്ചെങ്കിലും ഇവരെ കീഴ്‌പെടുത്തുകയായിരുന്നു. കെ.എല്‍-01-ബി.യു-2591 എന്ന യഥാര്‍ഥ നമ്പരിനു മുകളില്‍ കെ.എല്‍-21 ബി- 590 എന്ന കളള നമ്പര്‍ പതിച്ചാണ് ബൈക്ക് ഓടിച്ചിരുന്നത്.
ദിവസങ്ങള്‍ക്ക് മുന്‍പ് അനന്തപുരി ആശുപത്രിയുടെ പാര്‍ക്കിങ് ഏര്യയില്‍ സൂക്ഷിച്ചിരുന്ന പേട്ട സ്വദേശി അസീഫിന്റെ ബൈക്കാണ് യുവാക്കള്‍ മോഷ്ടിച്ചത്. കോടതിയില്‍ ഹാജരാക്കിയ പ്രതികളെ റിമാന്റ് ചെയ്തു.