നീലേശ്വരം: ജനങ്ങള്‍ പുതിയ കറന്‍സിക്കായി ബാങ്കുകള്‍ക്കു മുന്നില്‍ ക്യൂ നില്‍ക്കുമ്പോള്‍ നീലേശ്വരം ആലിന്‍കീഴിലെ ഹമീദ് നെട്ടോട്ടമോടുന്നതു നിനച്ചിരിക്കാതെ തന്റെ കൈയില്‍ വന്നു ചേര്‍ന്ന ഡോളര്‍ മാറാന്‍. നീലേശ്വരം വി.എസ് ഓട്ടോ സ്റ്റാന്‍ഡിലെ ഡ്രൈവറായ ഇദ്ദേഹത്തിനു കഴിഞ്ഞ ദിവസമാണു വാടകയായി രണ്ടു അമേരിക്കന്‍ ഡോളര്‍ ലഭിച്ചത്.
ബസ് സ്റ്റാന്‍ഡില്‍ നിന്നും പടന്നക്കാട് ഒഴിഞ്ഞവളപ്പിലെ  റിസോര്‍ട്ടിലേക്കു അമേരിക്കന്‍ ദമ്പതികള്‍ വാടകയായി വിളിച്ചതു ഹമീദിന്റെ റിക്ഷയായിരുന്നു. 100 രൂപയാണു ഇവിടുത്തേക്കുള്ള വാടക. എന്നാല്‍ വാടക നല്‍കാന്‍ കൈയില്‍ ഇന്ത്യന്‍ രൂപ ഇല്ലാതെ വന്നപ്പോള്‍ ഇവര്‍ രണ്ടു അമേരിക്കന്‍ ഡോളര്‍ നല്‍കുകയായിരുന്നു. കൗതുകത്തിനായി താനിതു വാങ്ങുകയായിരുന്നെന്നു ഹമീദ് പറഞ്ഞു. എന്നാല്‍ ഇപ്പോള്‍ ഇതു എവിടെ മാറാനാകുമെന്ന ആശങ്കയിലാണ് ഇദ്ദേഹം.