ന്യൂഡല്‍ഹി:കള്ളപ്പണത്തിന്റെ നിരോധിത നോട്ടുകള്‍ മറ്റുള്ളവരുടെ അക്കൗണ്ടില്‍ നിക്ഷേപിച്ചാല്‍ ഏഴു വര്‍ഷം വെളിച്ചം കാണില്ല. അസാധുവാക്കിയ കണക്കില്‍പ്പെടാത്ത നോട്ടുകള്‍ മറ്റുള്ളവരുടെ ബാങ്ക് അക്കൗണ്ടില്‍ ഇട്ടാല്‍ ഏഴുവര്‍ഷംവരെ തടവ് ശിക്ഷ ലഭിക്കുമെന്ന് ആദായനികുതി വകുപ്പാണ് മുന്നറിയിപ്പ് നല്‍കുന്നത്.
ബിനാമി ട്രാന്‍സാക്ഷന്‍ ആക്ടിലെ വകുപ്പുകളില്‍ ഭേദഗതി വരുത്തിയാണ് ഈ ശിക്ഷാ നിയമം നടപ്പാക്കാന്‍ പോകുന്നത്. ഈ മാസം ഒന്നുമുതല്‍ ഭേദഗതി വരുത്തിയ നിയമം പ്രാബല്യത്തില്‍ വന്നതായും ആദായനികുതി വകുപ്പ് ഉദ്യോഗസ്ഥന്‍ അറിയിച്ചു. പുതുക്കിയ നിയമമനുസരിച്ച് പണം നല്‍കുന്നയാളും അക്കൗണ്ട് ഉടമയും വിചാരണ നേരിടേണ്ടിവരും. തടവുമാത്രമല്ല പിഴ ശിക്ഷയും ലഭിച്ചേക്കും.
നോട്ട് പിന്‍വലിക്കല്‍ പ്രഖ്യാപിക്കപ്പെട്ട നവംബര്‍ എട്ടിനുശേഷം നടന്ന വലിയ ഇടപാടുകളെ സംബന്ധിച്ച് ആദായനികുതി വകുപ്പ് അന്വേഷണം നടത്തുന്നുണ്ട്. കള്ളപ്പണക്കാര്‍ മറ്റുള്ളവരുടെ അക്കൗണ്ടിലൂടെ പണം മാറ്റിയെടുക്കുന്നതായി ആദായനികുതി വകുപ്പിനു സൂചന ലഭിച്ചിട്ടുണ്ട്.