പാലക്കാട്: ആളിയാറില്‍ നിന്നും നല്‍കേണ്ട വെള്ളത്തിന്റെ അളവ് കുറച്ചു. പറമ്പിക്കുളം ആളിയാര്‍ സംയുക്ത ജല ക്രമീകരണ ബോര്‍ഡ് യോഗത്തിലെടുത്ത തീരുമാനത്തിന് വിരുദ്ധമായാണ് തമിഴ്‌നാട് വീണ്ടും കേരളത്തിന് നല്‍കുന്ന ജലത്തിന്റെ അളവ് വെട്ടിക്കുറച്ചത്.
ഈ മാസം 15 മുതല്‍ 30 വരെ കേരളത്തിന് നല്‍കേണ്ടത് 310 ദശലക്ഷം ഘനയടി വെള്ളമാണ്. ഇതുപ്രകാരം സെക്കന്‍ഡില്‍ 240 ഘനയടി തോതില്‍ വെള്ളം തുറന്നു വിടണം. ഇപ്പോള്‍ 170 ഘനയടിയാണ് വെള്ളം വിട്ടിട്ടുള്ളത്. ജൂലൈ ഒന്നുമുതല്‍ നവംബര്‍ 15 വരെ കരാര്‍ പ്രകാരം ചിറ്റൂര്‍ പുഴയിലേക്ക് 3.2 ടി.എം.സി. വെള്ളം നല്‍കണം. ഇപ്പോള്‍ കേരളത്തിന് കിട്ടിയത് 1.9 ടി.എം.സി യാണ്. പറമ്പിക്കുളം ഗ്രൂപ്പ് ഡാമുകളില്‍ നിന്നും സര്‍ക്കാര്‍പതി പവര്‍ ഹൗസില്‍ നിന്നും വൈദ്യുതി ഉണ്ടാക്കി പുറത്തേക്കു വിടുന്ന വെള്ളം മുഴുവന്‍ കോണ്ടൂര്‍ കനാല്‍ വഴി തിരുമൂര്‍ത്തി ഡാമില്‍ എത്തിച്ച്, തമിഴ്‌നാട് മധുര, രാമനാഥപുരം, ജില്ലകളിലെ കൃഷിക്ക് വെള്ളം ഉപയോഗിക്കുകയാണ്.

ഇത് വലിയ കരാര്‍ ലംഘനമാണെങ്കിലും കേരളസര്‍ക്കാര്‍ ഒന്നും പറയുന്നില്ല. പറമ്പിക്കുളത്തു നിന്നും16.25 ടി.എം.സി വെള്ളമേ തമിഴനാടിനു നല്‍കേണ്ടതുള്ളൂ. ഇതിന്റെ ഇരട്ടി വെള്ളം അവര്‍ കൊണ്ടുപോകുന്നുണ്ട്. ആളിയാറില്‍ വെള്ളം ഇല്ലെന്ന കാരണം പറഞ്ഞാണ് കേരളത്തിന് നല്‍കേണ്ട വെള്ളം ഇപ്പോള്‍ തരാത്തത്. ആളിയാറില്‍ നിന്നും വെള്ളം നല്‍കാന്‍ തയാറാവാത്തതിനാല്‍ ഇതിന്റെ ശിക്ഷ ഏറ്റുവാങ്ങേണ്ടി വന്നത് പാലക്കാട്ടെ കര്‍ഷകരാണ്.

കഴിഞ്ഞ ദിവസം ജില്ലയിലെ വിവിധ ഡാമുകളുടെ ഉപദേശക സമിതി യോഗത്തില്‍ രണ്ടാം വിള നെല്‍കൃഷി ഇറക്കരുതെന്ന് അധികൃതര്‍ തീരുമാനിച്ചിട്ടുണ്ട്. വെള്ളം കുറച്ച് ഉപയോഗിക്കാന്‍ പറ്റുന്ന കൃഷികള്‍ ചെയ്യാന്‍ കൃഷി വകുപ്പും ഉത്തരവിട്ടുകഴിഞ്ഞു. ഇതിനു വിരുദ്ധമായി കൃഷി ചെയ്തു ഉണക്കം ബാധിച്ചാല്‍ ഒരു സഹായവും കിട്ടാതിരിക്കാനാണ് തീരുമാനം ജില്ലാകലക്ടറുടെ അധ്യക്ഷതയില്‍ ചേര്‍ന്നെടുത്തതെന്നും, ആദ്യമായാണ് ജില്ലയില്‍ രണ്ടാംവിള ഇറക്കേണ്ടതില്ലെന്ന് ഭരണകൂടം തീരുമാനിച്ചതെന്നും കര്‍ഷകര്‍ ആരോപിക്കുന്നു.
ഇതിനിടയില്‍ ശിരുവാണിയില്‍ നിന്നും തമിഴ്‌നാടിന് നല്‍കുന്ന കുടിവെള്ളം നിര്‍ത്തണമെന്ന ആവശ്യവും യോഗത്തില്‍ ഉയര്‍ന്നു. ശിരുവാണി വെള്ളം നിര്‍ത്തിയാലും തമിഴ്‌നാടിന് പ്രശ്‌നമാവില്ല. ഇപ്പോള്‍ തിരുമൂര്‍ത്തി ഡാമിന് താഴത്ത് നാലോളം വാട്ടര്‍ടാങ്കുകളും ജലശുദ്ധീകരണികളും നിര്‍മിച്ച് വരുന്നുണ്ട്.
2017ല്‍ പദ്ധതി പൂര്‍ത്തീകരിച്ചു കുടിവെള്ള വിതരണം നടത്തും. ഇതോടെ ശിരുവാണി വെള്ളം കിട്ടിയില്ലെങ്കിലും കുടി വെള്ളക്ഷാമം പരിഹരിക്കാന്‍ കഴിയുമെന്നും തമിഴ്‌നാട്ടിലെ ഒരു ഉയര്‍ന്ന ഉദ്യോഗസ്ഥന്‍ പറഞ്ഞു. ഇതിനിടയില്‍ മലമ്പുഴ ഡാമിന്റെ മുഖ്യ ജലസ്രോതസായ ഒന്നാം പുഴയുടെ ഉത്ഭവ സ്ഥാനത്തു ചെറിയ ചെക്കുഡാമുകള്‍ നിര്‍മിച്ച് കര്‍ഷകര്‍ പ്രദേശത്തേക്ക് വെള്ളം കൊണ്ടുപോകുന്നതിനാല്‍ മലമ്പുഴയില്‍ നീരൊഴുക്ക് കുറഞ്ഞുകൊണ്ടിരിക്കുകയാണ്.