നെടുമ്പാശ്ശേരി: പെരിയാറിലേക്ക് ഉപ്പ് വെള്ളം കയറുന്നത് തടയുന്നതിന് വേണ്ടി പുറപ്പിള്ളിക്കാവില്‍ റെഗുലേറ്റര്‍ സ്ഥാപിക്കുന്ന നടപടികള്‍ പൂര്‍ത്തിയായതോടെ നാല്‍പത് വര്‍ഷത്തിലേറെയായി ഓരോ വര്‍ഷവും നിര്‍മ്മിച്ചു വരുന്ന താല്‍ക്കാലികമണല്‍ ബണ്ട് ചരിത്രത്തിന്റെ ഭാഗമായി.
1974 മുതലാണ് കുന്നുകര പഞ്ചായത്തിലെ ചെറിയ തേയ്ക്കാനത്തേയും കരുമാല്ലൂര്‍ പഞ്ചായത്തിലെ പുറപ്പിള്ളിക്കാവിനെയും ബന്ധിപ്പിച്ചു കൊണ്ട് പെരിയാറിനു കുറുകെ മണല്‍ ബണ്ട് നിര്‍മിക്കാന്‍ ആരംഭിച്ചത്. മുന്നൂറ് മീറ്ററോളം നീളത്തിലാണ് പെരിയാറിനു കുറുകെ മണല്‍ ബണ്ട് നിര്‍മിച്ചിരുന്നത്.
ഓരോ വര്‍ഷവും നവംബര്‍ അവസാനത്തോടെ പൂര്‍ത്തിയാക്കുന്ന മണല്‍ ബണ്ട് കാലവര്‍ഷം ശക്തിപെട്ട് പെരിയാറിലെ നീരൊഴുക്ക് വര്‍ധിക്കുന്നതോടെ മെയ് മാസം അവസാനമാകുമ്പോഴേക്കും തനിയെ തകരുകയാണ് പതിവ്.
ആദ്യകാലങ്ങളില്‍ ആലപ്പുഴ മൈനര്‍ ഇറിഗേഷന്‍ വിഭാഗത്തില്‍ നിന്നുമെത്തുന്ന രണ്ട് ഡ്രഡ്ജറുകളാണ് നിര്‍മാണം നടത്തിയിരുന്നത്. പിന്നീട് മണല്‍ ലഭ്യത കുറഞ്ഞതോടെ ഏതാനും വര്‍ഷങ്ങളായി മൂന്ന് ഡ്രഡ്ജറുകള്‍ ഇവിടെ ബണ്ട് നിര്‍മാണത്തിനെത്തിയിരുന്നു. ഓരോ വര്‍ഷവും ബണ്ട് തകരുന്നതോടെ ഡ്രഡ്ജ് ചെയ്ത് കൂട്ടുന്ന മണല്‍ പലപ്പോഴും മണല്‍ മാഫിയ കടത്തിക്കൊണ്ടു പോകുകയാണ് ചെയ്തിരുന്നത്.
പത്ത് മീറ്ററോളം വീതിയില്‍ നിര്‍മിക്കുന്ന മണല്‍ ബണ്ടിനു മുകളിലൂടെ നാട്ടുകാര്‍ക്ക് കാല്‍നടയായും അത്യാവശ്യം ഇരുചക്രവാഹനങ്ങളിലും മറുകരയെത്താനും സഹായകരമാകുമായിരുന്നു. പല വര്‍ഷങ്ങളിലും ബണ്ട് നിര്‍മ്മാണം വൈകുന്നത് മൂലം കാര്‍ഷിക, കുടിവെള്ള മേഖലയില്‍ വന്‍ പ്രതിസന്ധിക്ക് വഴിവച്ചിരുന്നു.
റെഗുലേറ്റര്‍ നിര്‍മാണം ഇടയ്ക്ക് തടസ്സപ്പെട്ടതോടെ ആവശ്യമായി വന്നാല്‍ ഈ വര്‍ഷം കൂടി മണല്‍ ബണ്ട് നിര്‍മിക്കാന്‍ മൈനര്‍ ഇറിഗേഷന്‍ വിഭാഗം തീരുമാനിച്ചിരുന്നു.
ഇതിനായി രണ്ട് ഡ്രഡ്ജറുകള്‍ പുറപ്പിള്ളിക്കാവിലേക്ക് പുറപ്പെടാന്‍ ആലപ്പുഴയില്‍ തയാറാക്കി നിര്‍ത്തിയിരുന്നു. റെഗുലേറ്ററിന്റെ നിര്‍മാണം പൂര്‍ത്തിയായതോടെ പെരിയാറില്‍ ഉപ്പ് വെള്ള ഭീഷണിയില്‍ നിന്നും ശാശ്വത പരിഹാരമാകുകയാണ്.