ന്യൂഡല്‍ഹി: ആറു സംസ്ഥാനങ്ങളില്‍ നടന്ന ഉപതെരഞ്ഞെടുപ്പുകളില്‍ തൃണമൂല്‍ കോണ്‍ഗ്രസിനും ബി.ജെ.പിക്കും ജയം. നാല് ലോക്‌സഭാ സീറ്റിലേക്കും 10 നിയമസഭാ സീറ്റിലേക്കുമാണ് തെരഞ്ഞെടുപ്പ് നടന്നത്. ലോക്‌സഭാ സീറ്റുകളില്‍ രണ്ടു വീതം നേടി ബി.ജെ.പിയും തൃണമൂല്‍ കോണ്‍ഗ്രസും വിജയം ആവര്‍ത്തിച്ചു. നിയമസഭാ സീറ്റില്‍ ബി.ജെ.പി, എ.ഐ.എ.ഡി.എം.കെ കക്ഷികള്‍ മൂന്നും സിപി.എം രണ്ടും തൃണമൂല്‍ കോണ്‍ഗ്രസും കോണ്‍ഗ്രസും ഓരോന്നും വീതം സീറ്റ് നേടി. മധ്യപ്രദേശ്, അസം എന്നിവിടങ്ങളിലാണ് ബി.ജെ.പി ലോക്‌സഭാ വിജയം നേടിയത്. പശ്ചിമബംഗാളിലും ത്രിപുരയിലും വന്‍തോതില്‍ വോട്ടു വര്‍ധിപ്പിച്ച് ബി.ജെ.പി രണ്ടാമത്തെ വലിയ കക്ഷിയായി. മധ്യപ്രദേശിലെ ഷാദോള്‍ ലോക്‌സഭാ സീറ്റും അസമിലെ ലകിംപൂര്‍ സീറ്റുമാണ് ബി.ജെ.പി നിലനിര്‍ത്തിയത്.
സര്‍ബാനന്ദ സോനോവാള്‍ അസം മുഖ്യമന്ത്രിയായപ്പോള്‍ വന്ന ഒഴിവിലാണ് ലകിംപൂരില്‍ ഉപതെരഞ്ഞെടുപ്പ് നടന്നത്. മധ്യപ്രദേശിലെ നേപാനഗര്‍ നിയമസഭാ സീറ്റും അസമിലെ ബൈതലങ്‌സോ നിയമസഭാ സീറ്റും ബി.ജെ.പിക്ക് ലഭിച്ചു. അരുണാചലില്‍ ഹയുലിയാങ് നിയമസഭാ സീറ്റിലും ബി.ജെ.പി സ്ഥാനാര്‍ഥിയാണ് വിജയിച്ചത്. അന്തരിച്ച മുന്‍ മുഖ്യമന്ത്രി കലീകോപുളിന്റെ ഭാര്യ ദസാങ്‌ലൂ പുളാണ് ബി.ജെ.പി ടിക്കറ്റില്‍ ഇവിടെ മത്സരിച്ചു ജയിച്ചത്.
ബംഗാളില്‍ കൂച്ച് ബിഹാര്‍, തംലുക് ലോക്‌സഭാ സീറ്റുകളില്‍ തൃണമൂല്‍ കോണ്‍ഗ്രസ് വിജയം ആവര്‍ത്തിച്ചു. ത്രിപുരയിലെ ഖോവൈ, ബര്‍ജല നിയമസഭാ സീറ്റില്‍ സി.പി.എം വിജയിച്ചു. തമിഴ്‌നാട്ടിലെ തഞ്ചാവൂരില്‍ എ.ഐ.എ.ഡി.എം.കെ സ്ഥാനാര്‍ഥി രംഗസ്വാമി വിജയിച്ചു. അരവാക്കുറിച്ചി, തിരുപ്പറംകുണ്ട്രം നിയമസഭാ മണ്ഡലങ്ങളിലും എ.ഐ.എ.ഡി.എം.കെക്കാണ് വിജയം. പുതുച്ചേരിയിലെ നെല്ലിത്തോപ്പില്‍ കോണ്‍ഗ്രസ് മുഖ്യമന്ത്രി വി.നാരായണസ്വാമി വിജയിച്ചു. ബംഗാളിലെ കൂച്ച്ബിഹാര്‍ ലോക്‌സഭ സീറ്റിലേക്ക് നടന്ന ഉപതെരഞ്ഞെടുപ്പില്‍ തൃണമൂല്‍ കോണ്‍ഗ്രസ് സ്ഥാനാര്‍ഥി പാര്‍ഥാപ്രഥീം റോയ് ആണ് വിജയിച്ചത്. 4,90000 വോട്ടുകള്‍ക്കാണ് ബിജെപിയിലെ ഹേമചന്ദ്ര ബര്‍മാനെ പരാജയപ്പെടുത്തിയത്.
ഇടതുമുന്നണിക്കു വേണ്ടി മത്സരിച്ച ഫോര്‍വേഡ് ബ്ലോക്ക് സ്ഥാനാര്‍ഥി മൂന്നാം സ്ഥാനത്തായി. നേരത്തെ 38000 വോട്ടുകള്‍ക്കായിരുന്നു തൃണമൂല്‍ വിജയിച്ചിരുന്നത്. അത് നാലു ലക്ഷത്തിലേക്കെത്തിക്കാന്‍ പാര്‍ഥാപ്രഥീം റോയ്ക്ക് കഴിഞ്ഞു. കഴിഞ്ഞ ശനിയാഴ്ചയായിരുന്നു വിവിധ സംസ്ഥാനങ്ങളില്‍ തെരഞ്ഞെടുപ്പ് നടന്നത്.