ന്യൂഡല്‍ഹി:എ.ടി.എമ്മുകള്‍ പുതിയ നോട്ട് സ്വീകരിക്കാന്‍ കഴിയുന്ന വിധത്തില്‍ ഉള്‍വിസ്താരം പുനക്രമീകരിക്കും. ഈ മാസത്തെ ശമ്പളം വിതരണം ചെയ്യാനായതിനാല്‍ പുനക്രമീകരണം വേഗത്തില്‍ പൂര്‍ത്തിയാക്കാനാണ് സര്‍ക്കാര്‍ റിസര്‍വ് ബാങ്കിനു നിര്‍ദേശം നല്‍കിയിരിക്കുന്നത്. രണ്ടുലക്ഷത്തോളം എ.ടി.എം മെഷീനുകളാവും ഇത്തരത്തില്‍ പുനക്രമീകരിക്കുക.
ഒരുദിവസം10,200 എന്ന തോതില്‍ 12 ദിവസം കൊണ്ട് രണ്ടുലക്ഷത്തോളം മെഷീനുകള്‍ പുനക്രമീകരിക്കാനാണ് സര്‍ക്കാര്‍ അടിയന്തരമായി ആവശ്യപ്പെട്ടിരിക്കുന്നത്. നിലവില്‍ 70,000ത്തോളം എ.ടി.എം മെഷീനുകള്‍ മാത്രമാണ് പുതിയ നോട്ടുകള്‍ കൈകാര്യംചെയ്യാന്‍ പാകത്തില്‍ പുനക്രമീകരിക്കപ്പെട്ടത്. പരിശീലനം ലഭിച്ച രണ്ടായിരത്തോളം എന്‍ജിനീയര്‍മാരാണ് മെഷീനുകള്‍ പുനക്രമീകരണം ചെയ്യുന്ന ജോലിയിലേര്‍പ്പെട്ടിരിക്കുന്നത്.
നിലവില്‍ സാധുവായ നോട്ടുകളില്‍ 100 രൂപയുടെ നോട്ട് മാത്രമാണ് പ്രയാസമില്ലാതെ എ.ടി.എം മെഷീനില്‍ സ്ഥാപിക്കാന്‍ കഴിയുന്നത്. ചെറിയമാറ്റത്തോടെ രണ്ടായിരത്തിന്റെ നോട്ട് മെഷിനീല്‍ വച്ചിട്ടുണ്ടെങ്കിലും 500 ന്റെ നോട്ട് വയ്ക്കാന്‍ കഴിഞ്ഞിട്ടില്ല. എ.ടി.എം ക്രമീകരണം ശരിയാവാത്തതിനാല്‍ ആവശ്യമായ പണം വിതരണം ചെയ്യാന്‍ റിസര്‍വ് ബാങ്കിനു സാധിച്ചിട്ടില്ല.
രണ്ടാഴ്ച കഴിഞ്ഞാല്‍ രാജ്യത്തെ 80 ശതമാനം എ.ടി.എം കൗണ്ടറുകളും പുനക്രമീകരിക്കാന്‍ കഴിയുമെന്നും ഇതുവഴി നോട്ടുകള്‍ പിന്‍വലിക്കാനുള്ള പരിധി ഉയര്‍ത്താമെന്നുമാണ് സര്‍ക്കാര്‍ കണക്കുകൂട്ടുന്നത്. ഈ മാസം എട്ടിനു നോട്ട് പിന്‍വലിക്കുന്നതായി പ്രധാനമന്ത്രി പ്രഖ്യാപിച്ചശേഷം 100ന്റെ നോട്ടുകള്‍ മാത്രമെ വിതരണം ചെയ്യാന്‍ കഴിഞ്ഞിരുന്നുള്ളൂ. പുതുതായി ഇറക്കിയ നോട്ടുകളുടെ ആകൃതിയിലെ വ്യത്യാസം കാരണം എ.ടി.എം മെഷീനുകളില്‍ ഇവ സ്വീകരിച്ചിരുന്നില്ല.