പേപ്പാറ: കാട്ടിനകത്ത് ഒരു തട്ടികൂട്ട് പണിയുടെ തട്ടിപ്പിന്റെ കഥകള്‍ പുറത്ത്. വനമേഖലയില്‍ നിന്നും നാട്ടിലെത്താന്‍ നിര്‍മിച്ച പാലത്തിന്റെ നിര്‍മാണത്തിലാണ് വന്‍ ക്രമക്കേട് നടന്നിരിക്കുന്നത്. അഗസ്ത്യവന മേഖലയിലെ ആദിവാസി സമൂഹത്തിന്റെ യാത്രാ സൗകര്യം ലക്ഷ്യമിട്ടു നിര്‍മിച്ച കാര്‍ലക്കോട് പാലത്തില്‍ വിള്ളല്‍ കണ്ടെത്തിയിരിക്കുന്നത് ഈ ക്രമക്കേടിന്റെ ഭാഗമാണെന്നാണ് പരാതി.
നിര്‍മാണത്തിലെ അപാകത മൂലം പല ഭാഗത്തും വിള്ളല്‍ വീണതോടെ പാലം അപകടാവസ്ഥയിലായി. കുത്തിയൊലിക്കുന്ന മലവെള്ളപ്പാച്ചിലില്‍ പാലം പൂര്‍ണമായും തകരുമെന്ന ഭീതിയിലാണ് ആദിവാസികള്‍. 201213 വര്‍ഷത്തിലാണ് ജി.കാര്‍ത്തികേയന്റെ ശ്രമഫലമായി വയലാര്‍ രവി എം.പിയുടെ ഫണ്ടില്‍ നിന്നനുവദിച്ച പണമുപയോഗിച്ച് പാലം പണിതത്.
കാര്‍ലക്കോട് ആറിനു കുറുകെ നിര്‍മിച്ച പാലത്തില്‍ ഇപ്പോള്‍ തന്നെ വിള്ളല്‍ വീണു. പാലത്തിന്റെ സ്ലാബ് സ്ഥാപിക്കാനുള്ള പാര്‍ശ്വഭിത്തി നിര്‍മാണത്തിലെ അപാകതയാണ് ഇപ്പോഴത്തെ പ്രശ്‌നത്തിനു കാരണം. ഇരുവശത്തും പാര്‍ശ്വഭിത്തി കോണ്‍ക്രീറ്റ് ചെയ്തു സ്ലാബ് വാര്‍ക്കണം. ഇങ്ങനെ പാര്‍ശ്വഭിത്തി നിര്‍മിച്ചു മണ്ണുനിറച്ച ഭാഗത്താണ് ഇപ്പോള്‍ വിള്ളല്‍ വീണത്. മഴയില്‍ ഇവിടെ നിറച്ചിരുന്ന മണ്ണ് ഒലിച്ചിറങ്ങിത്തുടങ്ങി.താമസിയാതെ തന്നെ പാലം തന്നെ അപ്രത്യക്ഷമാകുമെന്നാണു അധികൃതര്‍ വിലയിരുത്തുന്നത്. നിര്‍മാണം പൂര്‍ത്തിയായി ഒരു വര്‍ഷം തികയും മുമ്പേ പാലം അപകടാവസ്ഥയിലായതു ഗൗരവത്തിലെടുക്കാന്‍ അധികൃതര്‍ തയാറായിട്ടില്ല. ഇതു സംബന്ധിച്ചു വിജിലന്‍സ് അന്വേഷണമാവശ്യപ്പെട്ടു പരാതി നല്‍കാനൊരുങ്ങുകയാണ് ആദിവാസികള്‍.