മരട്: ദേശീയപാതയില്‍ കുണ്ടന്നൂര്‍ മുതല്‍ കണ്ണാടിക്കാട് വരെ സര്‍വീസ് റോഡില്‍ അനധികൃത പാര്‍ക്കിങ് മൂലം ഗതാഗത തടസം നിത്യ സംഭവമാകുന്നു. റോഡിനു സമീപമുള്ള നിരവധിയായ കാര്‍ ഷോറൂമുകളില്‍ ചിലതില്‍ വാഹനം പാര്‍ക്ക് ചെയ്യുന്നതിനുള്ള സ്ഥലം മുഴുവനായും പൂന്തോട്ടം നിര്‍മിച്ചിരിക്കുകയാണ്.
സ്ഥാപനങ്ങളിലെ ജീവനക്കാരുടെ നിരവധി ഇരുചകവാഹനങ്ങളും മറ്റു വാഹനങ്ങളും സര്‍വീസ് റോഡിലാണ് പാര്‍ക്ക് ചെയ്യുന്നത്. കൂടാതെ കാര്‍ ഷോറൂമുകളിലേക്ക് കാറുമായി വരുന്ന കണ്ടെയ്‌നര്‍ ലോറികള്‍ കാര്‍ ഇറക്കുന്നതും പാര്‍ക്ക് ചെയ്യുന്നതും സര്‍വീസ് റോഡിലാണ്. ഇത് മൂലം വാഹന അപകടങ്ങള്‍ ഇവിടെ പതിവാകുകയാണ്. കാല്‍ നട യാത്രക്കാര്‍ക്കും മറ്റു വാഹനയാത്രക്കാര്‍ക്കും ഇത് ദുരിതമാകുകയാണ്.
അനധികൃത പാര്‍ക്കിങ് തടയുന്നതിന് നാഷണല്‍ ഹൈവെ അധികൃതരും ട്രാഫിക്ക് പൊലിസും നടപടി സ്വീകരിക്കണമെന്ന് നഗരസഭ വൈസ് ചെയര്‍മാന്‍ കെ.എ.ദേവസി ആവശ്യപ്പെട്ടു.