ചേര്‍ത്തല: റവന്യു ജില്ലാ സ്‌കൂള്‍ കായിക മേളയില്‍ ആതിഥേയരായ ചേര്‍ത്തല ഉപജില്ല തുടര്‍ച്ചയായി എട്ടാം തവണയും കിരീടം നേടി ആധിപത്യം ഉറപ്പിച്ചു.
സെന്റ് മൈക്കിള്‍സ് കോളേജ് ഗ്രൗണ്ടില്‍ രണ്ടു ദിവസമായി നടന്ന മേളയില്‍  368   പോയിന്റ് നേടിയാണ് ചേര്‍ത്തല ഉപജില്ല ഓവറോള്‍ ചാമ്പ്യന്‍മാരായത്. രണ്ടാം സ്ഥാനത്ത് എത്തിയ ആലപ്പുഴ 250 പോയിന്റ് നേടി.  119 പോയിന്റുമായി മാവേലിക്കര  മൂന്നാം സ്ഥാനവും 74 പോയിന്റുമായി കായംകുളം നാലാം സ്ഥാനത്തും എത്തി. മറ്റ് ഉപജില്ലകള്‍ക്ക് കിട്ടിയ പോയിന്‍ര്. തുറവൂര്‍ 29, ചെങ്ങന്നൂര്‍ 28, മങ്കൊമ്പ് 18, ഹരിപ്പാട് 14, അമ്പലപ്പു 4, തകഴി മൂന്ന് വീതം പോയിന്റു നേടി. സ്‌കൂളുകളുടെ വിഭാഗത്തില്‍ 95 പോയിന്റ് നേടി ചേര്‍ത്തല ഉപജില്ലയിലെ ചാരമംഗലം ഗവ. ഡി.വി.എച്ച്.എസ് ഒന്നാമതെത്തി. മാവേലിക്കര മറ്റം സെന്റ് ജോണ്‍സ് എച്ച്.എസ്.എസ് 76 പോയിന്റോടെ രണ്ടാം സ്ഥാനം കരസ്ഥമാക്കി.
74 പോയിന്റുമായി അര്‍ത്തുങ്കല്‍ സെന്റ് ഫ്രാന്‍സീസ് അസിസി എച്ച്.എസ്.എസ് മൂന്നാം സ്ഥാനവും , ആലപ്പുഴ എസ്.ഡി.വി.ബി.എച്ച്.എസ്.എസ് 44 പോയിന്റോടെ നാലാം സ്ഥാനത്തും എത്തി.
36 പോയിന്റ് നേടിയ ആലപ്പുഴ സെന്റ് ജോസഫ്‌സ് ജി.എച്ച്.എസ്.എസ് അഞ്ച് സ്ഥാനത്ത്. 32 പോയിന്റുമായി ആലപ്പുഴ ലിയോതേര്‍ട്ടീന്ത് എച്ച്.എസ്.എസ് ആറാം സ്ഥാനത്തുണ്ട്. 29 പോയിന്റോടെ ചേര്‍ത്തല ഗവ. ഗേള്‍സ് ഹൈ്‌സ്‌കൂളാണ് പിന്നില്‍. സമാപന സമ്മേളനം ചേര്‍ത്തല തെക്ക് പഞ്ചായത്ത് പ്രസിഡന്‍ര് വി.എ. സേതുലക്ഷ്മി ഉദ്ഘാടനം ചെയ്തു. ഡി.ഡി.ഇ വി. അശോകന്‍ അധ്യക്ഷത വഹിച്ചു. കഞ്ഞിക്കുഴി ബ്ലോക്ക് പഞ്ചായത്ത് പ്രസിഡന്റ് സിനിമോള്‍ സോമന്‍ സമ്മാനദാനം നിര്‍വഹിച്ചു.