സഗ്രെബ്: ഫുട്‌ബോള്‍ ഇതിഹാസം മറഡോണയെ സാക്ഷിയാക്കി ഡേവിസ് കപ്പ് ടെന്നീസ് കിരീടം അര്‍ജന്റീന സ്വന്തമാക്കി. ഫൈനലില്‍ ക്രൊയേഷ്യയെ 3- 2നു പരാജയപ്പെടുത്തിയാണ് അര്‍ജന്റീന കിരീടം നേടിയത്. 116 വര്‍ഷം പഴക്കമുള്ള ടൂര്‍ണമന്റില്‍ ഇതാദ്യമായാണ് അര്‍ജന്റീന ചാംപ്യന്മാരാകുന്നത്. 1981, 2006, 2008, 2011 വര്‍ഷങ്ങളില്‍ ഫൈനലില്‍ എത്തിയിരുന്നെങ്കിലും കിരീടം നേടാന്‍ സാധിച്ചിരുന്നില്ല.
ഫൈനലിലെ ആദ്യ സിംഗിള്‍സില്‍ മരിന്‍ സിലിച്ച് വിജയിച്ചതോടെ ക്രൊയേഷ്യ മുന്നിലെത്തി. യുവാന്‍ മാര്‍ട്ടിന്‍ ഡെല്‍ പൊട്രോയിലൂടെ അര്‍ജന്റീന സമനില പിടിച്ചു. ഡബിള്‍സില്‍ സിലിച്ച്- ഇവാന്‍ ഡോഡിഗ് സഖ്യം ഡെല്‍ പൊട്രോ- ലിയനാര്‍ഡോ മയര്‍ കൂട്ടുക്കെട്ടിനെ തോല്‍പിച്ചതോടെ ക്രൊയേഷ്യ 2-1ന്റെ ലീഡെടുത്തു.
നിര്‍ണായകമായ അവസാന മത്സരങ്ങളില്‍ അര്‍ജന്റീനയുടെ ഡെല്‍ പൊട്രോ കടുത്ത മത്‌സരത്തില്‍ 6-7 (4-7), 2-6, 7-5, 6-4, 6-3 എന്ന സ്‌കോറിനു സിലിച്ചിനെ കീഴടക്കി 2-2നു സമനില പിടിച്ചു. കിരീട നിര്‍ണയ പോരാട്ടത്തില്‍ ഡെല്‍ബോണിസ് 6-3 6-4 6-2 എന്ന സ്‌കോറിനു ഇവോ കാര്‍ലോവിച്ചിനെ വീഴ്ത്തി അര്‍ജന്റീനയ്ക്ക് 3-2നു കിരീടവും സമ്മാനിച്ചു.