കരുനാഗപ്പള്ളി: പാവുമ്പായില്‍ തെരുവുനായുടെ ആക്രമണത്തില്‍ നാല് പേര്‍ക്ക് പരുക്ക്. നിരവധി വളര്‍ത്തു മൃഗങ്ങള്‍ക്കും കടിയേറ്റു.നായക്ക് പേവിഷബാധയുണ്ടെന്ന സംശയത്തെ തുടര്‍ന്ന് നാട്ടുകാര്‍ അതിനെ തല്ലിക്കൊന്നു.
കഴിഞ്ഞ ദിവസം ഉച്ചയ്ക്ക് മൂന്ന് മണിക്കായിരുന്നു സംഭവം. മുഖത്തും കൈക്കും കടിയേറ്റ പാവുമ്പതെക്ക് പത്താംവാര്‍ഡില്‍ മീത്തി വിളയില്‍ സഹദേവനെ താലൂക്കാശുപതിയിലും അവിടെ നിന്നും ജില്ലാ ആശുപത്രിയിലേക്കും കൊണ്ടുപോയി. പാവുമ്പ പാലമൂട് ഭാഗത്തു നിന്നും ഓടിയെത്തിയ നായ ചങ്ങന്‍മ്പുഴ ഗ്രന്ഥശാലയുടെ പരിസരത്തുള്ള വീട്ടില്‍ വസ്ത്രം കഴുകി കൊണ്ട് നിന്ന വീട്ടമ്മയെ കടിച്ചു. തുടര്‍ന്ന് ഗ്രാമപഞ്ചായത്തംഗം കൃഷ്ണ കുമാറിന്റെ വീട്ടിലെ വളര്‍ത്തുനായയെ കടിച്ചു.തൃപാവുമ്പ ക്ഷേത്ര ഗ്രൗണ്ടില്‍ എത്തിയ നായ് അവിടെ ഉണ്ടായിരുന്ന മറ്റുനായ്ക്കളെയും വീട്ടുവളപ്പുകളില്‍ ഉണ്ടായിരുന്ന കന്നുകാലികളേയും കടിച്ചു.
സംഭവമറിഞ്ഞ് മൃഗസംരക്ഷണവകുപ്പിന്റെ പ്രത്യേക സംഘം സ്ഥലത്തെത്തി കടിയേറ്റ വളര്‍ത്തു മൃഗങ്ങള്‍ക്ക് കുത്തിവെയ്പ് നല്‍കി.