കഠിനംകുളം: ജില്ലാ സ്‌കൂള്‍ കായിക മേളയില്‍ കഴിഞ്ഞ തവണ ഇഞ്ചോടിഞ്ച് പോരാട്ടത്തില്‍ നഷ്ടമായ കീരീടം നെയ്യാറ്റിന്‍കര ഉപജില്ല അസൂയാവഹമായ ഭൂരിപക്ഷത്തോടെ തിരിച്ചുപിടിച്ചു. രണ്ടാമതെത്തിയ തിരുവനന്തപുരം നോര്‍ത്തിനെ 61 പോയിന്റുകള്‍ക്ക് പിന്നിലാക്കിയാണ് നെയ്യാറ്റിന്‍കരയുടെ വിദ്യാര്‍ഥി പ്രതിഭകള്‍ കിരീടം നേടിയത്.
പത്ത് വര്‍ഷത്തിലേറെയായി നോര്‍ത്ത് കൈയടക്കി വച്ചിരുന്ന കീരീടം 2014 ല്‍ കടുത്ത പോരാട്ടത്തിലൂടെ നെയ്യാറ്റിന്‍കര നേടിയിരുന്നു . എന്നാല്‍ കഴിഞ്ഞ വര്‍ഷം അഞ്ച് പോയിന്റിന്റെ വ്യത്യാസത്തില്‍ നോര്‍ത്ത് വീണ്ടും കീരീടം തിരിച്ചെടുത്തു. വാശിയോടെ ട്രാക്കിലിറങ്ങിയ നെയ്യാറ്റിന്‍കരയുടെ താരങ്ങള്‍ തുടക്കം മുതല്‍ക്കേ അഭിമാനകരമായ പ്രകടനമാണ് കാഴ്ചവെച്ചത്.
റിലേ മത്സരങ്ങളിലെ മുന്‍തൂക്കമാണ് കഴിഞ്ഞ വര്‍ഷം നോര്‍ത്തിന് വിജയം സമ്മാനിച്ചത്. ഇത്തവണ അതേ റിലേ മത്സരങ്ങളില്‍ നാല് സ്വര്‍ണവും നാല് വെള്ളിയും നേടി നെയ്യാറ്റിന്‍കര ശക്തമായ തിരിച്ചു വരവ് നടത്തുകയായിരുന്നു.
18 സ്വര്‍ണവും 12 വെള്ളിയും 10 വെങ്കലവുമായി 168 പോയിന്റാണ് നെയ്യാറ്റിന്‍കരക്കു ലഭിച്ചത്.രണ്ടാമതെത്തിയ തിരുവനന്തപുരം നോര്‍ത്തിന് ആറ് സ്വര്‍ണവും 13 വെള്ളിയും 9 വെങ്കലവും ചേര്‍ത്ത് 107 പോയിന്റും ലഭിച്ചു. മൂന്നാം സ്ഥാനത്തുള്ള പാറശാല ഉപജില്ലയ്ക്ക് രണ്ട് സ്വര്‍ണവും മൂന്ന് വെള്ളിയും ആറ് വെങ്കലുമായി 31 പോയിന്റ് ലഭിച്ചു.
സ്‌കൂള്‍ തലത്തില്‍ ഒന്നാമതെത്താന്‍ ഏറ്റുമുട്ടിയ അരുമാനൂര്‍ എം.വി.എച്ച്.എസ്.എസിന്റെയും കാഞ്ഞിരംകുളം പി.കെ.എസ്.എച്ച്.എസ്.എസിന്റെയും മികവിലാണ് നെയ്യാറ്റിന്‍കര കീരീടം സ്വന്തമാക്കിയത്. സ്‌കൂള്‍ തലത്തില്‍ ഏഴ് സ്വര്‍ണവും നാല് വീതം വെള്ളിയും വെങ്കലവുമായി 51 പോയിന്റ് നേടി അരുമാനൂര്‍ എം.വി.എച്ച്.എസ്.എസ് ഓവറോള്‍ കിരീടം നിലനിര്‍ത്തി. ശക്തമായ മത്സരം കാഴ്ചവച്ച പി.കെ.എസ്.എച്ച്.എസ്.എസ്.എസ് ആറ് സ്വര്‍ണവും മൂന്ന് വീതം വെള്ളിയും വെങ്കലവുമായി 42 പോയിന്റ് നേടി രണ്ടാമതെത്തി. ഒരു സ്വര്‍ണവും എട്ട് വെള്ളിയും ഒരു വെങ്കലവുമായി 30 പോയിന്റ് നേടിയ ഹോളി എഞ്ചല്‍സ് കോണ്‍വെന്റ് എച്ച്.എസ്.എസാണ് മൂന്നാം സ്ഥാനത്ത്. 14 പോയിന്റുകള്‍ വീതം നേടിയ ആര്യനാട് വി.ആന്‍ഡ് എച്ച.എസ്.എസും, തിരുവനന്തപുരം സെന്റ് ജോസഫ് എച്ച്.എസ്.എസുമാണ് നാലാം സ്ഥാനത്തുള്ളത്. 11 പോയിന്റ് നേടിയ പാറശാല കുളത്തൂര്‍ ഗവ.വി.ആന്‍ഡ് എച്ച്.എസ്.എസാണ് അഞ്ചാമത്.
വിജയികള്‍ക്കുള്ള സമ്മാനദാനം ജില്ലാ പഞ്ചായത്ത് പ്രസിഡന്റ് വി.കെ.മധു നിര്‍വഹിച്ചു. ജില്ലാ വിദ്യാഭ്യാസ ഡെപ്യൂട്ടി ഡയറക്ടര്‍ എം.കെ.ഷൈന്‍മോന്‍ പങ്കെടുത്തു.