കോതമംഗലം: പൊലിസ് സ്റ്റേഷനില്‍ എസ്.ഐ അടക്കം മൂന്ന് പേരെ കയ്യേറ്റം ചെയ്ത സംഭവത്തില്‍ മുന്‍ സൈനീകരടക്കം മൂന്നംഗ സംഘത്തെ പൊലിസ് അറസ്റ്റ് ചെയ്തു.
പരസ്യ മദ്യപാനത്തിന് പിടിയിലായ റിട്ടയേര്‍ഡ് എയര്‍ഫോഴ്‌സ് ജീവനക്കാരായ ശോഭനപ്പടി പോത്താനിക്കാട്ട് സിജി മാത്യു (40), കോഴിപ്പിള്ളി പുതിയത്ത് മോളേല്‍ നൈജോ (40), ഇവരുടെ സുഹൃത്ത് തൊടുപുഴ കലയന്താനി കോട്ടൂര്‍ സെയ്ന്റ് മാത്യു (32) എന്നിവരാണ് പൊലിസിനെ കയ്യേറ്റം ചെയ്തത്. കോഴിപ്പിള്ളിക്ക് സമീപം ഓട്ടോറിക്ഷയിലിരുന്ന് മദ്യപിക്കുകയായിരുന്ന മൂന്നംഗ സംഘത്തെയാണ് ബുധനാഴ്ച രാത്രി കോതമംഗലം എസ്.ഐയും സംഘവും കസ്റ്റഡിയില്‍ എടുത്തത്.
സ്റ്റേഷനിലെത്തിക്കുന്ന സമയത്ത് ഇവര്‍ പൊലിസുമായി വാക്ക് തര്‍ക്കത്തില്‍ ഏര്‍പ്പെടുകയും കയ്യേറ്റം ചെയ്യുകയുമായിരുന്നു. എസ്.ഐ ലൈജുമോന്‍, ഗ്രേഡ് എസ്.ഐ ജോസ്, സി.പി.ഒ സലീം എന്നിവര്‍ക്ക് പരുക്കേല്‍ക്കുകയും ചെയ്തതായി പറയുന്നു. ബഹളം കേട്ടെത്തിയ കൂടുതല്‍ പൊലിസുകാര്‍ ചേര്‍ന്ന് ഇവരെ ലോക്കപ്പിലാക്കുകയായിരുന്നു. പൊലിസിന്റെ കൃത്യനിര്‍വഹണം തടസപ്പെടുത്തിയതിനും കയ്യേറ്റം ചെയ്തതിനും ഇവര്‍ക്കെതിരെ കേസ് എടുത്തു. പ്രതികളെ കോടതില്‍ ഹാജരാക്കി റിമാന്‍ഡു ചെയ്തു.