ന്യൂയോര്‍ക്ക്: പഞ്ചാബില്‍ ഭീകരാക്രമണത്തിന് ഗൂഢാലോചന നടത്തിയ കേസില്‍ നോര്‍ത്തേണ്‍ നെവേഡ സ്വദേശിയും ഇന്ത്യന്‍ വംശജനുമായ ബല്‍വിന്ദര്‍ സിങ് (42) കുറ്റക്കാരനെന്ന് റിനൊ ഡിസ്ട്രിക്റ്റ് ജഡ്ജി ലാറി ഹില്‍സ് വിധിച്ചു.
അടുത്തവര്‍ഷം ഫെബ്രുവരി 27ന് ശിക്ഷ വിധിക്കും. 15 വര്‍ഷത്തെ തടവുവരെ ലഭിക്കാവുന്ന കുറ്റമാണിത്. ശിക്ഷാ കാലാവധി പൂര്‍ത്തിയാകുമ്പോള്‍ ഇന്ത്യയിലേക്ക് തിരിച്ചയയ്ക്കും. 2013ലാണ് ഇന്ത്യയില്‍ ഭീകരാക്രമണം നടത്താന്‍ പദ്ധതിയിട്ടത്. ഇന്ത്യയിലെ പ്രമുഖരെ വധിക്കുന്നതിനും ബല്‍വിന്ദര്‍ സിങ് പദ്ധതിയിട്ടിരുന്നതായി യു.എസ് അറ്റോര്‍ണി ഡാനിയേല്‍, എ.ബി.ഐ സ്‌പെഷല്‍ ഏജന്റ് ഏരണ്‍, നാഷണല്‍ സെക്യൂരിറ്റി പ്രോസിക്യൂട്ടര്‍ മേരി എന്നിവര്‍ അറിയിച്ചു.
വിവിധ പേരുകളില്‍ അറിയപ്പെട്ടിരുന്ന ബല്‍വിന്ദര്‍ സിങിനെ റിനൊയില്‍വച്ച് 2013 ഡിസംബറിലാണ് പിടികൂടിയത്. ഖലിസ്ഥാനില്‍ സ്വതന്ത്ര സിഖ് സംസ്ഥാനം വേണമെന്ന് വാദിക്കുന്ന ബാബര്‍ ഖല്‍സ ഇന്റര്‍നാഷണല്‍, ഖലിസ്ഥാന്‍ സിന്ദാബദ് ഫോഴ്‌സ് എന്നീ സംഘടനകളുടെ ഗൂഢാലോചനയാണ് ബല്‍വീന്ദറിന്റെ അറസ്റ്റോടെ തകര്‍ന്നത്.
തെറ്റായ വിവരങ്ങള്‍ നല്‍കിയാണ് ഇയാള്‍ സാന്‍ഫ്രാന്‍സിസ്‌കോയില്‍ അഭയം നേടിയത്. 1999ല്‍ യു.എസില്‍ സ്ഥിരതാമസത്തിനുള്ള അനുമതി കരസ്ഥമാക്കിയ ഇയാള്‍ 2012 മുതല്‍ എഫ്.ബി.ഐയുടെ നിരീക്ഷണത്തിലായിരുന്നു.