കുന്നുംകൈ: മലയോരത്തു പക്ഷിപ്പനി ഭീതി പരത്തി വ്യാപകമായി കൊക്കുകള്‍ ചത്തൊടുങ്ങുന്നു. ഇന്നലെ രാവിലെ കുന്നുംകൈ, പാലക്കുന്ന് എന്നിവിടങ്ങളിലാണ് കൊക്കുകള്‍ ചത്ത നിലയില്‍ കാണപ്പെട്ടത്. ചില കൊക്കുകളെ അവശനിലയില്‍ കണ്ട നാട്ടുകാര്‍ അന്വേഷണം നടത്തിയപ്പോഴാണ് പലയിടങ്ങളിലായി കൊക്കുകള്‍ ചത്തുകിടക്കുന്നതു കണ്ടത്. കഴിഞ്ഞ ദിവസം ഈസ്റ്റ് എളേരി പഞ്ചായത്തിലെ ചില പ്രദേശങ്ങളില്‍ കൊക്കുകള്‍ ചത്തൊടുങ്ങിയതായും പറയുന്നു.
കഠിനമായ ചൂട് കാരണമാണു കൊക്കുകള്‍ ചത്തൊടുങ്ങുന്നതെന്നാണ് ആരോഗ്യ വകുപ്പ് പറയുന്നത്. കൊക്കുകള്‍ ചത്തുകിടക്കുന്നത് ശ്രദ്ധയില്‍ പെട്ടാല്‍ ആരോഗ്യവകുപ്പിനെ അറിയിക്കണമെന്ന് നര്‍ക്കിലക്കാട് പി.എച്ച്.സിയിലെ മെഡിക്കല്‍ ഓഫിസര്‍ പറഞ്ഞു.
കുളത്തിലോ കിണറ്റിലോ ചത്തുവീണാല്‍ ആ വെള്ളം ഉപയോഗിക്കരുതെന്നും ചത്തുകിടക്കുന്ന കൊക്കുകളെ ആരും സംസ്‌ക്കരിക്കരുതെന്നും അദ്ദേഹം പറഞ്ഞു.