മൊറാദാബാദ്: രാജ്യത്തെ ജനങ്ങളാണ് തന്റെ ഹൈക്കമാന്‍ഡ് എന്ന് പ്രധാനമന്ത്രി നരേന്ദ്രമോദി. ജനങ്ങള്‍ക്ക് വേണ്ടി അഴിമതിയും കള്ളപ്പണവും ഇല്ലാതാക്കുന്നതിനാണ് നോട്ടുകള്‍ നിരോധിച്ചത്. അഴിമതിക്കെതിരെ പോരാടിയതിന് ചിലര്‍ തന്നെ ഇപ്പോഴും ചോദ്യം ചെയ്യുകയാണ്. രാജ്യം അഴിമതിക്ക് എതിരാണ്. അഴിമതിക്കെതിരെ പോരാട്ടം നടത്തേണ്ടേ? അത് ഒരു കുറ്റമാണോ എന്നും മോദി ചോദിച്ചു. ഉത്തര്‍പ്രദേശിലെ മൊറാദാബാദില്‍ നടന്ന റാലിയില്‍ സംസാരിക്കുകയായിരുന്നു അദ്ദേഹം.

പഞ്ചസാര വാങ്ങാനും മണ്ണെണ്ണ വാങ്ങാനും ഗോതമ്പ് വാങ്ങാനുമെല്ലാം നമുക്ക് ക്യൂ നില്‍ക്കേണ്ടി വരുന്നു.60 വര്‍ഷമായി നമ്മള്‍ ഇതിനെല്ലാം വേണ്ടി ക്യൂ നില്‍ക്കുന്നു. ഈ രാജ്യത്തിന്റെ വിലപ്പെട്ട സമയം ക്യൂവില്‍ നിന്ന് നഷ്ടപ്പെടുന്ന സ്ഥിതിയാണ് ഉണ്ടായിരുന്നത്. എന്നാല്‍ ഇത്തരത്തിലുള്ള എല്ലാ ക്യൂകളും അവസാനിപ്പിക്കാനുള്ള പുതിയൊരു ക്യൂവാണ് ഇപ്പോള്‍ ബാങ്കുകള്‍ക്കു മുന്നില്‍ കാണുന്നതെന്നും മോദി പറഞ്ഞു.