കട്ടപ്പന: ഏഴാംക്ലാസ് വിദ്യാര്‍ഥിനിയെ പീഡിപ്പിച്ച യുവാവ് അറസ്റ്റില്‍. തങ്കമണി ഈട്ടിക്കവല ആലുമൂട്ടില്‍ സോജനാണ് (33) പിടിയിലാത്.
കുട്ടികള്‍ക്കെതിരായ അതിക്രമങ്ങളും സുരക്ഷയും സംബന്ധിച്ച് കെ.സി.എസ്.എലിന്റെ ആഭിമുഖ്യത്തില്‍ സ്‌കൂളില്‍ നടന്ന പഠനക്ലാസിനിടെയാണ് തനിക്കെതിരെയുണ്ടായ അതിക്രമം പെണ്‍കുട്ടി അധ്യാപികയോട് പറഞ്ഞത്.
അധ്യാപിക ചെല്‍ഡ് ലൈന്‍ പ്രവര്‍ത്തകരെ വിവരം അറിയിക്കുകയും തുടര്‍ന്ന് തങ്കമണി പൊലിസില്‍ പരാതിപ്പെടുകയുമായിരുന്നു. ഇതേതുടര്‍ന്ന് കട്ടപ്പന സി.ഐ വി.എസ് അനില്‍കുമാറിന്റെ നേതൃത്വത്തില്‍ അന്വേഷണം ആരംഭിച്ചു.
വൈദ്യ പരിശോധനയില്‍ പെണ്‍കുട്ടിക്ക് പീഡനമേറ്റതായി സ്ഥിരികരിച്ചു. പെണ്‍കുട്ടിക്ക് എട്ടുവയസു പ്രായമുള്ളപ്പോള്‍ തറവാട് വീട്ടില്‍ എത്തിയപ്പോഴാണ് ഇയാള്‍ ആദ്യമായി ഉപദ്രവിക്കുന്നത്. പിന്നീട് ഭീഷണിപ്പെടുത്തി പലതവണ ലൈംഗികമായി ഉപദ്രവിച്ചതായും പൊലിസ് പറഞ്ഞു. കൂലിപ്പണിക്കാരനായ പ്രതി കഞ്ചാവു കേസിലും നാട്ടില്‍ അടിപിടി കേസിലും പ്രതിയായിട്ടുണ്ട്.
തങ്കമണി എസ്.ഐ കെ.ജെ ജോഷി, സീനിയര്‍ സി.പി.ഒ എബ്രഹാം, സി.പി.ഒ റഷീദ് എന്നിവരുടെ നേതൃത്വത്തില്‍ വീട്ടില്‍ നിന്നാണ് പ്രതിയെ അറസ്റ്റു ചെയ്തത്. ഇന്നലെ കട്ടപ്പന സി.ഐ ഓഫീസിലെത്തിച്ച് കേസെടുത്തു. ഇന്ന് കോടതിയില്‍ ഹാജരാക്കും. പോക്‌സോ വകുപ്പ് ചുമത്തിയാണ് കേസെടുത്തിരിക്കുന്നത്.