മലപ്പുറം: മലപ്പുറം ഗവ. കോളജില്‍ എസ്.എഫ്.ഐ പ്രവര്‍ത്തകരുടെ വിളയാട്ടം. സംഭവത്തില്‍ പത്തോളം എം.എസ്.എഫ് പ്രവര്‍ത്തകര്‍ക്കു പരുക്കേറ്റു. മാരകായുധങ്ങളുമായി സംഘടിച്ചെത്തിയ സംഘം കോളജ് യൂനിയന്‍ റൂം, സ്‌പോര്‍ട്‌സ് റൂം എന്നിവ തല്ലിത്തകര്‍ത്തു. ഇന്നലെ ഉച്ചയ്ക്കു ശേഷമാണ് കോളജില്‍ സംഘര്‍ഷം അരങ്ങേറിയത്.
കോളജ് യൂനിയന്റെ നേതൃത്വത്തിലുള്ള സ്റ്റേജിതര മത്സരങ്ങള്‍ ഇന്നലെ ഉച്ചയ്ക്കു ശേഷം നടക്കാനിരിക്കെയാണ് ഒരു വിഭാഗം എസ്.എഫ്.ഐ നേതാക്കളുടെയും പ്രവര്‍ത്തകരുടെയും നേതൃത്വത്തില്‍ അക്രമം അരങ്ങേറിയത്. ഇരുമ്പു ചങ്ങല, ഇരുമ്പു വടി, പട്ടികക്കഷ്ണം, ഹോക്കി സ്റ്റിക് എന്നിവയുമായി സംഘടിച്ചെത്തിയ എസ്.എഫ്.ഐ പ്രവര്‍ത്തകര്‍ ദുല്‍കിഫ്‌ലി, മുനവ്വര്‍ തുടങ്ങി പത്തോളം എം.എസ്.എഫ് പ്രവര്‍ത്തകരെ മര്‍ദിക്കുകയായിരുന്നു.
വിദ്യാര്‍ഥികളെ അനുനയിപ്പിക്കാനെത്തിയ അധ്യാപകരുടെ മുന്നില്‍വച്ചും അക്രമം തുടര്‍ന്നു.
തുടര്‍ന്നു മാരകായുധങ്ങളുമായി എസ്.എഫ്.ഐ പ്രവര്‍ത്തകര്‍ കോളജിന്റെ അകത്തുകയറിയാണ് യൂനിയന്‍ റൂം തല്ലിത്തകര്‍ത്തത്. ഇതെല്ലാം കോളജിലെ സി.സി ടി.വിയില്‍ പതിഞ്ഞിട്ടുണ്ട്. യൂനിയന്‍ റൂമിലെ ജനല്‍, ഫര്‍ണിച്ചറുകള്‍ എന്നിവ തകര്‍ത്ത സംഘം റൂമിലെ ഫാന്‍, ട്യൂബ്, വൈദ്യുതി സ്വിച്ച് എന്നിവയും പൂര്‍ണമായി നശിപ്പിച്ചു. സ്റ്റേജിതര മത്സരങ്ങള്‍ക്കായി സ്ഥാപിച്ച ഫ്‌ളക്‌സ് ബോര്‍ഡ്, സ്‌കോര്‍ ബോര്‍ഡ് എന്നിവയും നശിപ്പിച്ചിട്ടുണ്ട്.
എം.എസ്.എഫ് യൂനിറ്റ് കമ്മിറ്റി, കോളജ് പ്രിന്‍സിപ്പല്‍ എന്നിവരുടെ പരാതിയെ തുടര്‍ന്നു മലപ്പുറം പൊലിസ് സ്ഥലത്തെത്തിയാണ് അക്രമം അവസാനിപ്പിച്ചത്.
സംഭവത്തെ തുടര്‍ന്നു കോളജിന് ഇന്നും നാളെയും പ്രിന്‍സിപ്പല്‍ അവധിപ്രഖ്യാപിച്ചു.