ഫറോക്ക്: കരുവന്‍തിരുത്തിയിലെ പ്രധാന ജലസ്രോതസുകളിലൊന്നായ നെടുമ്പുറം കുളത്തിന്റെ സംരക്ഷണത്തിനു പദ്ധതി ആവിഷ്‌കരിക്കുമെന്ന് വി.കെ.സി മമ്മദ്‌കോയ എം.എല്‍.എ. കുളം നശിക്കുന്നതായുള്ള നാട്ടുകാരുടെ പരാതിയെ തുടര്‍ന്നു കുളം സന്ദര്‍ശിച്ചു പ്രദേശവാസികളുമായി സംസാരിക്കുകയായിരുന്നു അദ്ദേഹം.
ആദ്യകാലങ്ങളില്‍ നെടുമ്പുറം പ്രദേശത്തിന്റെ ജലസമൃദ്ധിയായിരുന്നു കുളം. ഇന്നു കുളത്തിന്റെ സംരക്ഷണഭിത്തി നശിച്ചുകൊണ്ടിരിക്കുകയാണ്. നേരത്തെ, ജില്ലാ പഞ്ചായത്ത് ഫണ്ടുപയോഗിച്ച് ഭിത്തികെട്ടിയിരുന്നു. ഇതാണിപ്പോള്‍ കനത്തമഴയെ തുടര്‍ന്ന് തകര്‍ന്നത്. ഇതുമൂലം മാലിന്യങ്ങളും കുളത്തിലേക്കൊഴുകുകയാണ്.
കുളത്തിന്റെ അടുത്തുള്ള കിണറില്‍ നിന്നാണു നിരവധി വീടുകളില്‍ കുടിവെള്ളമെത്തിക്കുന്നത്. കുളത്തിലേക്കു മണ്ണ് ഊര്‍ന്നിറങ്ങുന്നതു തടയാന്‍ കോണ്‍ക്രീറ്റ് ഭിത്തികെട്ടി സംരക്ഷിക്കുമെന്നും ചെളി നീക്കം ചെയ്യാന്‍ നടപടി സ്വീകരിക്കുമെന്നും വി.കെ.സി മമ്മദ്‌കോയ.എം.എല്‍.എ ഉറപ്പു നല്‍കി. നഗരസഭാ കൗണ്‍സിലര്‍മാരായ കെ.എം റഷീദ്, കെ.ടി അബ്ദുല്‍ മജീദ് എന്നിവരും എം.എല്‍.എയ്‌ക്കൊപ്പമുണ്ടായിരുന്നു.