കല്‍പ്പറ്റ: വയനാട്ടില്‍ കാര്‍ഷിക മേഖല നേരിടുന്ന കടുത്ത പ്രതിസന്ധിയില്‍ നിന്ന് കൃഷിക്കാരെ കരകയറ്റാന്‍ സര്‍ക്കാര്‍  പ്രത്യേക പാക്കേജ് തയ്യാറാക്കണമെന്ന് കിസാന്‍സഭ ജില്ലാ കമ്മിറ്റി ആവശ്യപ്പെട്ടു. പൊതുവില്‍ പ്രതിസന്ധി നിലനില്‍ക്കവെ, കേന്ദ്ര സര്‍ക്കാര്‍ പ്രഖ്യാപിച്ച  നോട്ട് പിന്‍വലിക്കല്‍ കൂടിയായപ്പോള്‍ നാമമാത്ര-ചെറുകിട കര്‍ഷകരുടെ വരുമാന മാര്‍ഗങ്ങള്‍ പോലും വഴിമുട്ടി.
നാണ്യവിളകളുടെ വിളവെടുപ്പിന്റെ ഇടവേളയില്‍ ഹ്രസ്വകാല വിളകളും അടക്ക പോലുള്ള ഉല്‍പന്നങ്ങളുമാണ് കര്‍ഷകരെ പിടിച്ചുനില്‍ക്കാന്‍ സഹായിച്ചിരുന്നത്. നോട്ടുപ്രതിസന്ധി വന്നതോടെ പാക്കിന് വിലകുറഞ്ഞുവെന്ന് മാത്രമല്ല, ഒന്നോ രണ്ടോ ക്വിന്റല്‍ പാക്കുമായി വിപണിയിലെത്തുന്ന കര്‍ഷകര്‍ക്ക് പണത്തിന് പകരം വെള്ളക്കടലാസില്‍ എഴുതിയ ശീട്ട്  കൊടുക്കുകയാണ് വ്യാപാരികള്‍. തല്‍ക്കാലമുള്ള പണത്തിന്റെ ആവശ്യം പോലും ഇതുകൊണ്ട് നടക്കില്ല. കേന്ദ്ര സര്‍ക്കാര്‍ കണക്കാക്കുമ്പോലെ ബാങ്ക് ബാലന്‍സുള്ളവരല്ല വയനാട്ടിലെ നാമമാത്ര- ചെറു കര്‍ഷകര്‍. ബാങ്കുകളില്‍ നിന്നെടുക്കുന്ന വായ്പകളും കൊല്ലത്തില്‍ ലഭിക്കുന്ന തുച്ഛമായ വരുമാനവും കൊണ്ട് നിത്യജീവിതം  കഷ്ടിച്ച് തള്ളിനീക്കുന്നവരാണ് വയനാട്  ജില്ലയില്‍ ഈ ഗണത്തില്‍പ്പെടുന്ന കര്‍ഷകരില്‍  മഹാഭൂരിപക്ഷവും.  
കൃഷിക്കൊപ്പം ഒന്നോ രണ്ടോ കന്നുകാലികളെ കൂടി വളര്‍ത്തിയാണ്  പലരും കുടുംബം പോറ്റുന്നത്. കാലാവസ്ഥാ വ്യതിയാനം കര്‍ഷകരും  വന്യജീവികളും തമ്മിലുള്ള സംഘര്‍ഷം  വര്‍ധിപ്പിച്ചിരിക്കുകയാണ്. കാടും കൃഷിയിടങ്ങളും തമ്മില്‍ കൃത്യമായ വേര്‍തിരിവ് ഉണ്ടാക്കി വന്യമൃഗശല്യത്തിന് ശാശ്വത പരിഹാരം കാണണമെന്നും കിസാന്‍സഭ ജില്ലാ കമ്മിറ്റി ആവശ്യപ്പെട്ടു. ദേശീയ കര്‍ഷക പ്രക്ഷോഭത്തിന്റെ ഭാഗമായി ഈമാസം 20ന് കല്‍പ്പറ്റ ടെലിഫോണ്‍ എക്‌സ്‌ചേഞ്ചിലേക്ക് മാര്‍ച്ച് നടത്താനും തീരുമാനിച്ചു. പ്രസിഡന്റ് അഡ്വ കെ ഗീവര്‍ഗീസ് അധ്യക്ഷനായി. സെക്രട്ടറി പി.എസ് വിശ്വംഭരന്‍ റിപ്പോര്‍ട്ട് അവതരിപ്പിച്ചു. സംഘടനയുടെ ജില്ലാ വൈസ് പ്രസിഡന്റായി എ.എം ജോയിയെയും ജോയിന്റ് സെക്രട്ടറിയായി വി.ജി വിജയനെയും തെരഞ്ഞെടുത്തു.