ഈരാറ്റുപേട്ട: പുത്തന്‍പള്ളി-തടവനാല്‍-വേയിലുകാണാംപാറ ബൈപാസ് റോഡ് നിര്‍മാണ പ്രവൃത്തി ഉടന്‍ പൂര്‍ത്തിയാക്കണമെന്ന് ആക്ഷന്‍ കൗണ്‍സില്‍. സ്ഥലവാസികള്‍ പലരും സ്ഥലം നല്‍കിയിട്ടും പുത്തന്‍പള്ളി കമ്മിറ്റിയിലെ ചിലരുടെ പിടിവാശി മൂലമാണു പാലംപണി മുടങ്ങിയതെന്ന് കൗണ്‍സില്‍ ആരോപിച്ചു.
പാലം പണിയുന്നതിനായി കഴിഞ്ഞ യു.ഡി.എഫ് സര്‍ക്കാര്‍ പത്തുകോടി രൂപ അനുവദിച്ചിരുന്നു. നിര്‍മാണ പ്രവൃത്തികളുടെ തുടക്കംകുറിച്ച് പുത്തന്‍പള്ളി തടവനാല്‍ ഭാഗത്ത് മീനച്ചിലാറിനുകുറുകെ 13 മീറ്റര്‍ വീതിയിലും 60 മീറ്റര്‍ നീളത്തിലും പാലം പണി തുടങ്ങുകയും ചെയ്തു. ഈരാറ്റുപേട്ട പീരുമേട് സ്റ്റേറ്റ് ഹൈവേക്കു സമാന്തരമായി നിര്‍മിക്കുന്ന പാലത്തിനു പുത്തന്‍പള്ളിയുടെ കൈവശമുള്ള 1.6 സെന്റ് സ്ഥലം വിട്ടുനല്‍കാത്തതിന്റെ പേരിലാണു പാലം നിര്‍മാണം നിലച്ചത്.
പി.സി ജോര്‍ജ് എം.എല്‍.എയുടെയും മറ്റു ജനപ്രതിനിധികളുടെയും നേതൃത്വത്തില്‍ പുത്തന്‍പള്ളി മഹല്ല് കമ്മിറ്റി ഭാരവാഹികളുമായി നിരവധി തവണ ചര്‍ച്ച നടത്തിയിരുന്നു. പാലം നിര്‍മാണത്തിനായി വിട്ടുനല്‍കുന്ന സ്ഥലത്തിനും അതിലുള്ള 1.5 ഷട്ടര്‍ കടമുറിക്കും നഷ്ടപരിഹാരം നല്‍കുമെന്നും എം.എല്‍.എയും ബന്ധപ്പെട്ട പി.ഡബ്ല്യൂ.ഡി റവന്യൂ ഉദ്യോഗസ്ഥരും ഉറപ്പുനല്‍കുകയും ചെയ്തിട്ടുണ്ട്.
പാലം നിര്‍മാണം പൂര്‍ത്തീകരിച്ചാല്‍ മാത്രമെ ഇവിടെ റോഡ് നിര്‍മാണം നടത്താനാകൂ. അതിനാല്‍ ഈരാറ്റുപേട്ടയിലെ ജനങ്ങളുടെ സ്വപ്‌നപദ്ധതിയായ പുത്തന്‍പള്ളി-വേയിലുകാണാംപാറ ബൈപാസ് റോഡ്, തടവനാല്‍-മുഹ്‌യിദ്ദീന്‍ പള്ളി ബൈപാസ് റോഡ് യാഥാര്‍ഥ്യമാക്കാന്‍ എല്ലാവരും ഒറ്റക്കെട്ടായി പ്രവര്‍ത്തിക്കണമെന്ന് ബൈപാസ് റോഡ് ആക്ഷന്‍ കൗണ്‍സില്‍ ഭാരവാഹികള്‍ വാര്‍ത്താസമ്മേളനത്തില്‍ ആവശ്യപ്പെട്ടു.
മുഹമ്മദ്ഖാന്‍ പുത്തന്‍വീട്ടില്‍, കെ.എം സുലൈമാന്‍, സുഹാന എം. റസാക്ക്, അന്‍സാരി പ്ലാമൂട്ടില്‍, നൗഷാദ് കല്ലുപുരക്കല്‍ വാര്‍ത്താസമ്മേളനത്തില്‍ പങ്കെടുത്തു.