കാഞ്ഞിരപ്പള്ളി: ഉപജില്ലാ കലോത്സവത്തില്‍ എ.കെ.ജെ.എം ഹയര്‍ സെക്കന്‍ഡറി സ്‌കൂളിന് ഓവറോള്‍ കിരീടം. യു.പി വിഭാഗത്തില്‍ ഓവറോളും, ഹൈസ്‌കൂള്‍-ഹയര്‍ സെക്കന്‍ഡറി വിഭാഗങ്ങളില്‍ റണ്ണേഴ്‌സ് അപ്പും, എല്‍.പി വിഭാഗത്തില്‍ മൂന്നാം സ്ഥാനവും നേടി 397 പോയിന്റോടെയാണ് സ്‌കൂള്‍ ചരിത്ര വിജയം സ്വന്തമാക്കിയത്.
എല്ലാ വിഭാഗങ്ങളിലുമായി 322 പോയിന്റോടെ എരുമേലി സെന്റ് തോമസ് എച്ച്.എസ്.എസ് റണ്ണേഴ്‌സ് ട്രോഫി കരസ്ഥമാക്കി. ചിറക്കടവ് എസ്.ആര്‍.പി.എന്‍.എസ്.എസ്.വി.എച്ച്.എസ്.എസ് 305 പോയിന്റോടെ മൂന്നാം സ്ഥാനത്തും 282 പോയിന്റോടെ പനമറ്റം ഗവ. എച്ച്.എസ്.എസ് നാലാം സ്ഥാനത്തും 281 പോയിന്റോടെ കാഞ്ഞിരപ്പള്ളി സെന്റ് ഡൊമിനിക്‌സ് എച്ച്.എസ്.എസ് അഞ്ചാം സ്ഥാനത്തുമെത്തി.
ഹയര്‍ സെക്കന്‍ഡറി ജനറല്‍ വിഭാഗത്തില്‍ എരുമേലി സെന്റ് തോമസ് ഹയര്‍ സെക്കന്‍ഡറി സ്‌കൂള്‍ 138 പോയിന്റോടെ ഓവറോള്‍ ചാംപ്യന്മാരായി. 122 പോയിന്റുമായി കാഞ്ഞിരപ്പള്ളി എ.കെ.ജെ.എം.എച്ച്.എസ്.എസ് രണ്ടാം സ്ഥാനത്തും 113 പോയിന്റോടെ കാഞ്ഞിരപ്പള്ളി സെന്റ് ഡൊമിനിക്‌സ് എച്ച്.എസ്.എസ് മൂന്നാംസ്ഥാനം സ്വന്തമാക്കി.
സമാപന സമ്മേളനം എന്‍. ജയരാജ് എം.എല്‍.എ ഉദ്ഘാടനം ചെയ്തു. ചിറക്കടവ് പഞ്ചായത്ത് വൈസ് പ്രസിഡന്റ് ടി.എന്‍ ഗിരീഷ്‌കുമാര്‍ അധ്യക്ഷനായി. ഗ്രാമപഞ്ചായത്തംഗങ്ങളായ ഷാജി പാമ്പൂരി, റിജോ വാളാന്തറ, സോമ അനീഷ്, റോസമ്മ കത്തലാക്കല്‍, ഉപജില്ലാ വിദ്യാഭ്യാസ ഓഫിസര്‍ സി.എന്‍ തങ്കച്ചന്‍, നാസര്‍ മുണ്ടക്കയം, ഇബ്രാഹിംകുട്ടി, പ്രവീണ്‍കുമാര്‍, സാന്റു കെ. ജോര്‍ജ് സംസാരിച്ചു.