എരുമപ്പെട്ടി: കടങ്ങോട് പഞ്ചായത്തിന്റെ വിവിധ ഭാഗങ്ങളില്‍ പൈപ്പുകള്‍ പൊട്ടി ശുദ്ധജലം പാഴാകുന്നു. കടങ്ങോട് ശുദ്ധജല വിതരണ പദ്ധതിയില്‍ ഉള്‍പ്പെട്ട പൈപ്പുകള്‍ പൊട്ടിയാണ് കുടിവെള്ളം പാഴാകുന്നത്. പാഴിയോട്ടു മുറി പാത്രമംഗലം റോഡിലും, പാഴിയോട്ടു മുറി കയറ്റത്തിലുമുള്ള പൈപ്പുകള്‍ പൊട്ടി മാസങ്ങളോളമായി വെള്ളം ഒഴുകി പോകുന്നു. രൂക്ഷമായ കുടിവെള്ള ക്ഷാമം നേരിടുന്ന പഞ്ചായത്താണ് കടങ്ങോട്. പഞ്ചായത്തിലെ പല കോളനികളിലേക്കും കടങ്ങോട് ശുദ്ധജല വിതരണ പദ്ധതി ഉപയോഗിച്ചാണ് ശുദ്ധ ജലം എത്തിക്കുന്നത്. പൈപ്പ് പൊട്ടി വെള്ളം കോളനികളില്‍ എത്താത്തതുമൂലം കുടിവെള്ളത്തിനായി വളരെ ദൂരം സഞ്ചരിക്കേണ്ട അവസ്ഥയാണ് കോളനിവാസികള്‍ക്കുള്ളത്. റോഡില്‍ പൈപ്പ് പൊട്ടി ശുദ്ധജലം പാഴായി പോകുന്നത് നാട്ടുകാര്‍ നിരവധി തവണ അധികൃതരുടെ ശ്രദ്ധയില്‍പ്പെടുത്തിയിട്ടും വേണ്ട നടപടിയെടുക്കാന്‍ അധികൃതര്‍ ഇതുവരേയും തയാറായിട്ടില്ല.