തരുവണ: ഗവ.ഹയര്‍ സെക്കന്‍ഡറി സ്‌കൂളില്‍ നടന്നുവരുന്ന ഉപജില്ലാ സ്‌കൂള്‍ കലാമേളയില്‍ പ്രദേശത്തെ നവമാധ്യമ കൂട്ടായ്മകളുടെ പങ്കാളിത്തം ശ്രദ്ധേയമാകുന്നു. തരുവണയിലെ പ്രവാസികളുടെ കൂട്ടായ്മയായ പ്രവാസി ഗ്രൂപ്പും തരുവണ സ്വദേശികളുടെ കൂട്ടായ്മയായ വോയ്‌സ് ഓഫ് തരുവണയുമാണ് കലാമേളയില്‍ സജീവ സാന്നിധ്യമാകുന്നത്. ട്രോഫികളും പ്രധാന വേദിയും ഒരുക്കി നല്‍കിയാണ് ഇവരുടെ പങ്കാളിത്തം.
ഗള്‍ഫ് രാജ്യങ്ങളില്‍ ജോലി ചെയ്യുന്ന തരുവണ സ്വദേശികളായ പ്രവാസികളാണ് മേളയിലെ മത്സരങ്ങളില്‍ ഒന്നും രണ്ടും സ്ഥാനങ്ങള്‍ കരസ്ഥമാക്കുന്ന വര്‍ക്കായി വ്യക്തിഗത ട്രോഫികള്‍ സംഭാവന ചെയ്തിരിക്കുന്നത്. 1400 പേര്‍ക്കാണ് ട്രോഫികള്‍ നല്‍കുക. ഇതിനായി കാല്‍ ലക്ഷത്തേളം രൂപയാണ് പ്രവാസികളായ ഗ്രൂപ്പ് അംഗങ്ങള്‍ ചിലവഴിക്കുന്നത്. കലാമേളയിലെ പ്രധാന വേദിയായ കൈരളി സ്‌പോണ്‍സര്‍ ചെയ്തു കൊണ്ടാണ് തരുവണയിലെ മറ്റൊരു വാട്‌സാപ്പ് ഗ്രൂപ്പായ വോയ്‌സ് ഓഫ് തരുവണ മേളയുമായി സഹകരിക്കുന്നത്. ഗ്രൂപ്പിലെ അംഗങ്ങള്‍ സ്വരൂപിക്കുന്ന 12,000 രൂപയോളയാണ് ഇതിനായി ചെലവഴിക്കുന്നത്. സാമൂഹ്യ മാധ്യമങ്ങളിലെ കൂട്ടായ്മകള്‍ നന്മക്കായി വിനിയോഗിക്കാന്‍ കഴിയുമെന്ന് സ്‌കൂള്‍ മേളയില്‍ തെളിയിക്കുകയാണ് തരുവണയില്‍.