വടക്കാഞ്ചേരി: നഗരസഭയിലെ പുതുരുത്തി വടക്കേക്കര കനാലിന് സമീപം വനത്തില്‍ അജ്ഞാത സംഘത്തെ കണ്ടത് മേഖലയില്‍ വലിയ ഭീതി പരത്തി. കാട്ടില്‍ മാവോയിസ്റ്റുകള്‍ തമ്പടിച്ചിട്ടുണ്ടെന്ന വാര്‍ത്ത പരന്നതോടെ ജനങ്ങള്‍ ഭയാശങ്കയിലായി ഇന്നലെ ഉച്ചയോടെയാണ് ഉള്‍ വനത്തിലേക്ക് തമിഴ് സംസാരിക്കുന്ന സംഘാംഗങ്ങള്‍ കയറി പോകുന്നത് നാട്ടുകാരുടെ ശ്രദ്ധയില്‍പെട്ടത്.
ജനങ്ങള്‍ ബഹളം വെച്ചപ്പോള്‍ ഇവര്‍ ഉള്‍വനത്തിലേക്ക് ഓടിമറഞ്ഞുവത്രെ. ഇതോടെ പൊലിസില്‍ വിവരമറിയിക്കുകയായിരുന്നു. സ്ഥലത്ത് കുതിച്ചെത്തിയ ഉന്നത പൊലിസ് ഉദ്യോഗസ്ഥരുടെ നേതൃത്വത്തിലുള്ള വടക്കാഞ്ചേരി, എരുമപ്പെട്ടി പൊലിസ് സംഘവും വനപാലകരും കാട്ടില്‍ അരിച്ച് പെറുക്കുന്നതിനിടെ പാറയിടുക്കില്‍ നിന്ന് ഭക്ഷണവും, അരിയും, ബാഗും വസ്ത്രങ്ങളുമൊക്കെ കണ്ടെത്തിയത് ഭീതി വര്‍ദ്ധിപ്പിച്ചു.
വെള്ള ടാങ്കും, മൊബൈല്‍ ഫോണും പൊലിസ് സംഘം കണ്ടെത്തിയിട്ടുണ്ട്. തോക്കേന്തിയ സുരക്ഷാ ഉദ്യോഗസ്ഥര്‍ നാട്ടുകാരുടെ സഹായത്തോടെ മണികൂറുകളോളം കാട് മുഴുവന്‍ അരിച്ച് പെറുക്കിയിട്ടും ആരേയും കണ്ടെത്താനായില്ല. മേഖലയിലെ കാടുകളില്‍ വ്യാപകമായി കണ്ട് വരുന്ന അകില്‍ കടത്താനെത്തിയ കൊള്ളക്കാരാണ് കാട്ടില്‍ തമ്പടിച്ചതെന്നാണ് പൊലിസ് നിഗമനം.സംഭവത്തെ കുറിച്ച് സമഗ്രമായ അന്വേഷണം ആരംഭിച്ചതായി പൊലിസ് അറിയിച്ചു.