ചീമേനി: ഹരിത കേരളം മിഷന്‍ പ്രവര്‍ത്തനത്തില്‍ മൗക്കോട് ഗവ. എല്‍.പി സ്‌കൂള്‍ കുട്ടികള്‍ പങ്കാളികളായത് വീടുകളില്‍ ജലസംരക്ഷണ ലഘുലേഖകള്‍ വിതരണം ചെയ്തുകൊണ്ട്. ജലസംരക്ഷണത്തിന്റെ പ്രധാന്യവും ശുദ്ധമണ്ണിന്റെ വീണ്ടെടുപ്പിനുള്ള സന്ദേശവും ഉള്‍ക്കൊള്ളുന്നതാണ് ലഘുലേഖ. കുട്ടികളുടെ നേതൃത്വത്തില്‍ വീടുകള്‍ തോറും കയറി ബോധവല്‍കരണം നടത്തിയാണ് ലഘുലേഖ വിതരണം ചെയ്തത്.
പൊതുജനങ്ങളുടെയും രക്ഷാകര്‍തൃസമിതിയുടെയും പങ്കാളിത്തത്തോടെ സമ്പൂര്‍ണ പ്ലാസ്റ്റിക് മുക്ത കാംപയിനായി മാറ്റാനുള്ള ഒരുക്കത്തിലാണ് സ്‌കൂള്‍ അധികൃതര്‍. ഇതിന്റെ ഭാഗമായി ഉപയോഗം കഴിഞ്ഞ പേനകളും പ്ലാസ്റ്റിക് കുപ്പികളും ശേഖരിച്ച് പുനരുപയോഗസംസ്‌കരണ പദ്ധതികള്‍ക്കായി കൈമാറും.
ഹരിത കേരളം മിഷന്റെ ഭാഗമായി ക്വിസ്, ചിത്രരചന, പ്രബന്ധരചനാ മത്സരങ്ങളും നടത്തി.പ്രകാശനച്ചടങ്ങില്‍ ഒ.കെ ബാലന്‍ അധ്യക്ഷനായി. വെസ്റ്റ് എളേരി പഞ്ചായത്തംഗം അനു പൂങ്ങോട് ഉദ്ഘാടനം ചെയ്തു. റോസ്‌ലി ജോസഫ്, ഖദീജ, വിനോദ് ദത്ത്, കെ.വി ഇബ്രാഹിം കുട്ടി, വിജയന്‍, ഗിരീഷ്, സുരേഷ്, ബിന്ധു സംസാരിച്ചു.