പുല്‍പ്പള്ളി: സാമൂഹികാരോഗ്യകേന്ദ്രത്തോടനുബന്ധിച്ച് ഡയാലിസിസ് യൂനിറ്റ് ആരംഭിക്കണമെന്ന ആവശ്യം ശക്തമാകുന്നു. മേഖലയില്‍ വൃക്കരോഗികളുടെ എണ്ണം വര്‍ധിക്കുന്ന സാഹചര്യത്തിലാണിത്. നിര്‍ധന കുടുംബാംഗങ്ങളാണ് രോഗികളില്‍ ഏറെയും. മറ്റു സ്ഥലങ്ങളില്‍ പോയി ഡയാലിസിസ് നടത്താന്‍ സാമ്പത്തിക പരിമിതികള്‍ ഇവരില്‍ പലര്‍ക്കും തടസമാകുകയാണ്. മുള്ളന്‍കൊല്ലി, പുല്‍പ്പള്ളി പ്രദേശങ്ങളില്‍ അര്‍ബുദ, പ്രമേഹ ബാധിതര്‍, ഹൃദ്രോഗികള്‍ എന്നിവരുടെ എണ്ണവും കൂടുതലാണ്. ജീവിതശൈലിയിലെ മാറ്റം മൂലം രോഗികളായവരും നിരവധിയാണ്. കാര്‍ഷിക തകര്‍ച്ചയാണ് ജീവിതശൈലിയിലെ വ്യതിയാനത്തിനു പ്രധാന കാരണമായി വിദഗ്ധര്‍ ചൂണ്ടിക്കാണിക്കുന്നത്. കാലാവസ്ഥയിലെ പിഴവുകള്‍ മൂലമുള്ള വിളനാശവും ഉത്പന്നവിലയിലെ അസ്ഥിരതയും കൃഷി അനാകര്‍ഷകമാക്കി. ഫലത്തില്‍ വ്യായാമരഹിത ജീവിതമാണ് കര്‍ഷക കുടുംബാംഗങ്ങളും നയിക്കുന്നത്. ഇതിനെ ജീവിതശൈലീരോഗങ്ങളുടെ വര്‍ധനവുമായി കൂട്ടിവായിക്കേണ്ടതുണ്ടെന്ന് ആരോഗ്യമേഖലയില്‍ പ്രവര്‍ത്തിക്കുന്നവര്‍ പറയുന്നു.