മാഡ്രിഡ്: സ്വപ്ന കുതിപ്പ് നടത്തുന്ന റയല്‍ മാഡ്രിഡ് സീസണില്‍ തോല്‍വിയറിയാതെ 35 മത്സരങ്ങളെന്ന റെക്കോര്‍ഡ് സ്വന്തമാക്കി കുതിക്കുന്നു. സ്പാനിഷ് ലാ ലിഗ പോരാട്ടത്തില്‍ ഡിപോര്‍ടീവോ ലാ കൊരുണയെ 3-2നു വീഴ്ത്തിയാണ് റയല്‍ പുതിയ ക്ലബ് റെക്കോര്‍ഡ് സ്വന്തമാക്കിയത്.  1988- 89 സീസണില്‍ ഡച്ച് പരിശീലകന്‍ ലീയോ ബീന്‍ഹാക്കറുടെ കീഴില്‍ റയല്‍ നേടിയ തുടര്‍ച്ചയായ 34 ജയങ്ങളുടെ റെക്കോര്‍ഡാണ് ഫ്രഞ്ച് ഇതിഹാസം സിനദിന്‍ സിദാന്‍ പരിശീലിപ്പിക്കുന്ന ടീം തിരുത്തിയത്.
കഴിഞ്ഞ ദിവസം ബാഴ്‌സലോണയ്‌ക്കെതിരായ എല്‍ ക്ലാസ്സിക്കോ പോരാട്ടത്തിന്റെ അവസാന നിമിഷം ഹെഡ്ഡറിലൂടെ വല ചലിപ്പിച്ച് റയല്‍ മാഡ്രിഡിനെ സമനിലയിലെത്തിച്ച നായകന്‍ സെര്‍ജിയോ റാമോസ് വീണ്ടും ടീമിന്റെ രക്ഷകനായ പോരാട്ടത്തിലാണ് ഡിപോര്‍ടീവോയ്‌ക്കെതിരേ റയല്‍ സമനില വിജയമാക്കി മാറ്റിയത്. 50ാം മിനുട്ടില്‍ ആല്‍വരോ മൊറാറ്റയിലൂടെ റയല്‍ മുന്നില്‍ കടന്നെങ്കിലും ജേസെലു 63, 65 മിനുട്ടുകളില്‍ നേടിയ ഇരട്ട ഗോളിലൂടെ ഡിപോര്‍ടീവോ മത്സരത്തില്‍ മുന്‍തൂക്കം നേടി. എന്നാല്‍ മരിയാനോ ഡയസ് 84ാം മിനുട്ടില്‍ റയലിനെ ഒപ്പമെത്തിച്ചു. കളി 90 മിനുട്ടും പിന്നിട്ട് ഇഞ്ച്വറി ടൈം രണ്ടില്‍ നില്‍ക്കേയാണ് ഹെഡ്ഡറിലൂടെ റാമോസ്  ടീമിനെ വിജയത്തിലേക്ക് നയിച്ചത്.
അപരാജിതരായി ഒന്നാം സ്ഥാനത്ത് തുടരുന്ന റയലിനു 37 പോയിന്റുകളാണ്. ജയത്തോടെ ബാഴ്‌സലോണയുമായുള്ള പോയിന്റ് വ്യത്യാസം ആറാക്കി ഉയര്‍ത്താനും റയലിനായി.