കൈറോ: ഈജിപ്തിലെ കോപ്റ്റിക് ക്രിസ്ത്യന്‍ ചര്‍ച്ചില്‍ ബോംബ് സ്‌ഫോടനത്തില്‍ 25 പേര്‍ മരിച്ചു. കൈറോയിലെ പ്രധാന കോപ്റ്റിക് ക്രിസ്ത്യന്‍ കത്തീഡ്രലിനു സമീപത്തുള്ള സെന്റ് പീറ്റേഴ്‌സ് ചര്‍ച്ചില്‍ ഞായറാഴ്ച പ്രാര്‍ഥനയ്ക്കിടെയാണു സംഭവം.
ഇന്നലെ പ്രാദേശിക സമയം പത്തിനാണ് ബോംബ് സ്‌ഫോടനമുണ്ടായത്. സംഭവത്തില്‍ 35 പേര്‍ക്കു പരുക്കേല്‍ക്കുകയും ചെയ്തതായി സര്‍ക്കാര്‍ വൃത്തങ്ങള്‍ അറിയിച്ചു. ഈജിപ്തിലെ കോപ്റ്റിക് ഓര്‍ത്തഡോക്‌സ് ക്രിസ്ത്യന്‍ ആസ്ഥാനവും പോപ് റ്റവാഡ്രോസ് രണ്ടാമന്റെ കേന്ദ്രവുമായ സെന്റ് മാര്‍ക്ക് കത്തീഡ്രലില്‍ അറ്റകുറ്റപ്പണികള്‍ നടക്കുന്നതിനാല്‍ തൊട്ടടുത്തുള്ള പീറ്റേഴ്‌സ് ചര്‍ച്ചിലായിരുന്നു ഇന്നലത്തെ പ്രാര്‍ഥനാ ചടങ്ങുകള്‍ നടന്നത്. ഇതിനിടെയായിരുന്നു സ്‌ഫോടനമുണ്ടായത്.