തിരൂര്‍: മൂന്നുദിവസത്തെ അവധി കഴിഞ്ഞ് ഇന്നലെ തുറന്ന ബാങ്കുകളില്‍ ആവശ്യത്തിന് പണമെത്താത്തതിനെ തുടര്‍ന്ന് ക്യൂ നിന്ന് വലഞ്ഞ ജനങ്ങള്‍ പ്രകോപിതരായി ബഹളംവച്ചു. ഇന്നലെ അതിരാവിലെ തന്നെ തിരൂരിലെ എ.ടി.എമ്മുകള്‍ക്ക് മുന്നില്‍ ക്യൂ നിന്നവരാണ് ബാങ്കുകള്‍ പ്രവര്‍ത്തനമാരംഭിച്ച് മണിക്കൂറുകള്‍ കഴിഞ്ഞിട്ടും എ.ടി.എമ്മുകളില്‍ പണം ലഭ്യമാകാത്തതിനെ തുടര്‍ന്ന് പ്രതിഷേധിച്ചത്. തിരൂര്‍ താഴെപ്പാലത്തെ എസ്.ബി.ഐയ്ക്ക് മുന്നില്‍ ബാങ്ക് പ്രവര്‍ത്തനം തുടങ്ങുന്നതിന് മണിക്കൂറുകള്‍ക്ക് മുന്‍പു തന്നെ ജനങ്ങള്‍ പണത്തിനായി എ.ടി.എമ്മുകള്‍ക്ക് മുന്നില്‍ ന്യൂ നിന്നിരുന്നു. തിരൂര്‍ നഗരത്തിലെ സ്വകാര്യ ബാങ്കുകള്‍ക്ക് മുന്നിലും രാവിലെ തന്നെ വലിയ ക്യൂവായിരുന്നു. എന്നാല്‍ രാവിലെ 11 മണിയായിട്ടും എ.ടി.എമ്മുകളില്‍ പണമെത്താത്തതിനെ തുടര്‍ന്ന് ജനങ്ങള്‍ പ്രതിഷേധിക്കുകയായിരുന്നു. ക്യൂ നിന്ന് വലഞ്ഞവര്‍ ബാങ്ക് ഉദ്യോഗസ്ഥരുമായി വാക്കേറ്റമുണ്ടായി. ജനങ്ങളില്‍ ചിലര്‍ തമ്മിലും പ്രശ്‌നങ്ങളുണ്ടായി. തുടര്‍ന്ന് 12ഓടെ എ.ടി.എമ്മുകളില്‍ പണമെത്തിച്ചതോടെയാണ് പ്രശ്‌നങ്ങള്‍ പരിഹരിക്കപ്പെട്ടത്.