വടക്കാഞ്ചേരി: നഗരസഭയിലെ ഓട്ടുപാറ ബസ് സ്റ്റാന്‍ഡ് മഴയൊന്ന് നിലത്ത് വീണതോടെ ചെളിക്കുണ്ടായി. ബസ് സ്റ്റാന്‍ഡിനുള്ളിലെ ടാര്‍ ഇളകി വലിയ കുഴികള്‍ രൂപപ്പെട്ട് കിടക്കാന്‍ തുടങ്ങിയിട്ട് നാളുകളേറെയായിട്ടും പ്രശ്‌ന പരിഹാരത്തിന് നഗരസഭ ഒരു നടപടിയും കൈകൊണ്ടിരുന്നില്ല. ഇത് വലിയ പ്രതിഷേധത്തിന് വഴിവെച്ചിരുന്നു. ഇന്നലെ ശക്തമായി മഴ പെയ്തതോടെ ഈ കുഴിയില്‍ മുഴുവന്‍ മലിന ജലം കെട്ടി നില്‍ക്കുകയും ബസ് സ്റ്റാന്‍ഡിനുള്ളിലൂടെ ആര്‍ക്കും നടന്ന് പോകാന്‍ പോലും കഴിയാത്ത സാഹചര്യം ഉടലെടുക്കുകയുമായിരുന്നു.
വെള്ള കെട്ടിലൂടെ വാഹനങ്ങള്‍ കടന്ന് പോകുമ്പോള്‍ യാത്രക്കാരുടെ ശരീരത്തിലേക്ക് മലിനജലം തെറിക്കുന്ന അവസ്ഥയും ഉണ്ടായി. ബസ് സ്റ്റാന്‍ഡിനുള്ളിലെ കടകളിലേക്കും വെള്ള മെത്തി. തകര്‍ന്ന് കിടക്കുന്ന ബസ് സ്റ്റാന്‍ഡ് എത്രയും പെട്ടെന്ന് പൂര്‍വസ്ഥിതിയിലാക്കണമെന്ന് ജനങ്ങള്‍ ആവശ്യപ്പെടുമ്പോഴും അധികൃതര്‍ തികഞ്ഞ മൗനത്തിലാണെന്ന് ജനങ്ങള്‍ കുറ്റപ്പെടുത്തുന്നു.
സ്റ്റാന്‍ഡിനുള്ളിലെ ജീര്‍ണാവസ്ഥയിലായ കംഫര്‍ട്ട് സ്റ്റേഷന്‍ കെട്ടിടം നിരന്തര ജനകീയാവശ്യത്തെ തുടര്‍ന്ന് പൊളിച്ച നഗരസഭ അതിന്റെ അവശിഷ്ടങ്ങള്‍ അവിടെ നിന്ന് മാറ്റാന്‍ പോലും തയ്യാറായിട്ടില്ല. ബസ് സ്റ്റാന്‍ഡിന് മുന്നിലെ ഹൈമാസ്റ്റ് വിളക്ക് കണ്ണടച്ച് കിടക്കാന്‍ തുടങ്ങിയിട്ടും നാളുകളേറെയായി.