തൊടുപുഴ: ടി.സി വാങ്ങനെത്തിയ മുന്‍ എസ്.എഫ്.ഐ പ്രവര്‍ത്തകനെ അമ്മയുടെ മുന്നിലിട്ട് മര്‍ദ്ദിച്ചതായി പരാതി. മുട്ടം എന്‍ജിനിയറിംഗ് കോളജിലെ രണ്ടാം വര്‍ഷ ഇലക്ട്രിക്കല്‍ വിദ്യാര്‍ഥി തൃശ്ശൂര്‍ കടവല്ലൂര്‍ ചമ്മൂര്‍ വീട്ടില്‍ ഗോകുല്‍.സി.അഷ്ടമനാണ് (21) മര്‍ദ്ദനമേറ്റത്. തലയ്ക്കും മുഖത്തും പരിക്കേറ്റ ഗോകുലിനെ തൊടുപുഴ ജില്ലാ ആശുപത്രിയില്‍ പ്രവേശിപ്പിച്ചു.
കോളജിന് മുന്നിലെ ബസ് കാത്തിരിപ്പു കേന്ദ്രത്തില്‍ വച്ചായിരുന്നു മര്‍ദ്ദനം. കോളജിലെ എസ്.എഫ്.ഐ പ്രവര്‍ത്തകരായ ഒരുകൂട്ടം വിദ്യാര്‍ഥികള്‍ പെണ്‍കുട്ടികളെ കമന്റടിച്ചെന്നാരോപിച്ച് തന്നെ മാസങ്ങളായി ഉപദ്രവിക്കുകയായിരുന്നെന്ന് ഗോകുല്‍ പരാതിയില്‍ പറയുന്നു. ഇതില്‍ മനം മടുത്താണ് അമ്മയുമായി ടി.സി വാങ്ങാന്‍ കോളജില്‍ എത്തിയത്. അമ്മയെ കോളജ് ഓഫീസിലേക്ക് വിട്ടശേഷം താന്‍ കോളജിന് പുറത്ത് ബസ് കാത്തിരിപ്പു കേന്ദ്രത്തില്‍ ഇരിക്കുകയായിരുന്നു.
ഈ സമയം പിറകില്‍ നിന്ന് വന്ന ഒരു സംഘം വിദ്യാര്‍ഥികള്‍ തന്റെ തലക്കും മുഖത്തും മര്‍ദ്ദിക്കുകയായിരുന്നു.
അടികൊണ്ട് നിലത്ത് വീണ തന്നെ ചവിട്ടുകയും കോളജിന്റെ കവാടത്തിലേക്ക് വലിച്ചിഴച്ചുകൊണ്ട് പോകാന്‍ ശ്രമിച്ചെന്നും നിലവിളികേട്ട് ഓടി വന്ന അമ്മ ബിന്ദുവിനെയും മര്‍ദ്ദിക്കാന്‍ ശ്രമിച്ചെന്നും പരാതിയില്‍ പറയുന്നു.