പെരിന്തല്‍മണ്ണ: തൂത പാറല്‍ വാഫി കാംപസ് 12-ാം വാര്‍ഷികവും വാഫി സനദ്ദാന സമ്മേളനവും നാളെ നടക്കുമെന്ന് ഭാരവാഹികള്‍ പത്രസമ്മേളനത്തില്‍ പറഞ്ഞു. പെരിന്തല്‍മണ്ണ തറയില്‍ ബസ് സ്റ്റാന്റിന് സമീപത്തെ സമ്മേളനനഗരിയില്‍ പാണക്കാട് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. വൈകിട്ട് നാലിന് നടക്കുന്ന മജ്‌ലിസുന്നൂറിനും പ്രാര്‍ഥനാസദസിനും അത്തിപ്പറ്റ മൊയ്തീന്‍ കുട്ടി മുസ്‌ലിയാര്‍, ഏലംകുളം ബാപ്പു മുസ്‌ലിയാര്‍ എന്നിവര്‍ നേതൃത്വം നല്‍കും.
ഏഴിന് നടക്കുന്ന സനദ്ദാന സമ്മേളനത്തില്‍ ദാറുല്‍ ഉലൂം വാഫി കാംപസില്‍ നിന്ന് പഠനം പൂര്‍ത്തിയാക്കിയ 71 യുവപണ്ഡിതര്‍ക്ക് ഹൈദരലി ശിഹാബ് തങ്ങള്‍ സനദ്‌നല്‍കും. സമസ്ത കേരള ജംഇയ്യത്തുല്‍ ഉലമാ ജനറല്‍സെക്രട്ടറി കെ ആലിക്കുട്ടി മുസ്‌ലിയാര്‍ സനദ്ദാന പ്രഭാഷണം നടത്തും. അബ്ദുല്‍ ഹകീം ഫൈസി ആദൃശ്ശേരി വാഫി സന്ദേശ പ്രഭാഷണം നടത്തും. സമസ്ത ട്രഷറര്‍ ജിഫ്രി മുത്തുക്കോയ തങ്ങള്‍, സെക്രട്ടറി കോട്ടുമല ബാപ്പു മുസ്‌ലിയാര്‍, വൈസ് പ്രസിഡന്റ് എം.ടി അബ്ദുല്ല മുസ്‌ലിയാര്‍, സൈദ് മുഹമ്മദ് നിസാമി, കെ.എ റഹ്മാന്‍ ഫൈസി, മഞ്ഞളാംകുഴി അലി എം.എല്‍.എ, അഡ്വ. നാലകത്ത് സൂപ്പി തുടങ്ങിയ പ്രമുഖര്‍ പങ്കെടുക്കും.
ലോക അറബിഭാഷാ ദിനത്തോടനുബന്ധിച്ച് വാഫി കോളജ് വിദ്യാര്‍ഥി സംഘടന പുറത്തിറക്കിയ ' സമന്വയം 17' സുവനീര്‍ ഹൈദരലി ശിഹാബ് തങ്ങള്‍ തറയില്‍ മുസ്തഫക്ക് കോപ്പി നല്‍കി പ്രകാശനം ചെയ്യും. അബ്ദുല്‍ ഖാദര്‍ ഹാജി, അലി ഫൈസി, കുഞ്ഞീദ് ഹാജി, മുഹമ്മദ് കോയ തങ്ങള്‍ പാതായ്ക്കര, എന്‍.ടി.സി മജീദ്, മുഹമ്മദ് ഹബീബുള്ള ഫൈസി, നൗഫല്‍ ഹുദവി, സത്താര്‍ ആനമങ്ങാട്, മുസ്തഫ വാഫി എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.