കൊച്ചി: ഓണ്‍ലൈന്‍ ടാക്‌സി യാത്രികര്‍ക്കെതിരെ വീണ്ടും ഓട്ടോ ഡ്രൈവര്‍മാര്‍. ഗായിക സയനോരയെയാണ് ഇത്തവണ ഓട്ടോ ഡ്രൈവര്‍മാര്‍ ഭീഷണിപ്പെടുത്തിയത്. ഒരു മാസത്തിനിടെ രണ്ടാം തവണയാണ് ഓണ്‍ലൈന്‍ ടാക്‌സിയില്‍ യാത്ര ചെയ്യുന്നവരെ ഓട്ടോ  ടാക്‌സി ഡ്രൈവര്‍മാര്‍ ഭീഷണിപ്പെടുത്തുന്നത്.
ഇന്നലെ പുലര്‍ച്ചെ മൂന്നിന്  മലബാര്‍ എക്‌സ്പ്രസില്‍ നോര്‍ത്ത് സ്‌റ്റേഷനില്‍ എത്തിയ സയനോര പനമ്പിള്ളി നഗറിലേക്ക് പോകുന്നതിനായാണ് യൂബര്‍ ടാക്‌സി ബുക്ക് ചെയ്തത്. സയനോരയുമായി വാഹനം മുന്‍പോട്ടു നീങ്ങിയപ്പോള്‍  ഒരു സംഘം ഓട്ടോറിക്ഷ ഡ്രൈവര്‍മാര്‍ ഭീഷണിയുമായി എത്തുകയായിരുന്നുവെന്ന് സയനോര  ഫേസ്ബുക്ക് ലൈവിലൂടെ വ്യക്തമാക്കി.
ഒറ്റയ്ക്ക് യാത്ര ചെയ്ത തനിക്കു സ്ത്രീയെന്ന പരിഗണന പോലും നല്‍കിയില്ല.
കേരളം പോലൊരു സംസ്ഥാനത്ത് ഇത്തരത്തിലൊരു സംഭവം നടക്കുമെന്ന് ഒരിക്കലും കരുതിയില്ല- അവര്‍ കൂട്ടിച്ചേര്‍ത്തു.
യൂബര്‍ ഡ്രൈവറുടെ കോളറില്‍ പിടിക്കുകയും സീറ്റ് ബെല്‍റ്റ് പൊട്ടിക്കാന്‍ ശ്രമിക്കുകയും ചെയ്തു.  താന്‍ ഒറ്റയ്ക്കാണെന്നും ബാഗുകളും മറ്റും ഉണ്ടെന്ന് പറഞ്ഞെങ്കിലും അവര്‍ പിന്തിരിഞ്ഞില്ല.
താന്‍ ബഹളംവച്ചതോടെയാണ് അക്രമികള്‍ പിന്‍വാങ്ങിയത്.  സംഭവവുമായി ബന്ധപ്പെട്ട് സയനോര ഐ.ജി ശ്രീജിത്തിന് പരാതി കൈമാറി.