കോഴിക്കോട്: മാവോയിസ്റ്റ് നേതാവ് അജിതയുടെ മൃതദേഹം ഇന്ന് ഉച്ചയോടെ കോഴിക്കോട് വെസ്റ്റ് ഹില്ലിലുള്ള ശ്മശാനത്തില്‍ സംസ്‌കരിക്കും. ഇക്കാര്യത്തില്‍ ഇന്നലെ ഹൈക്കോടതി ഉത്തരവ് പുറപ്പെടുവിച്ചിരുന്നു.

കോഴിക്കോട് മെഡിക്കല്‍ കോളജ് മോര്‍ച്ചറിയില്‍ സൂക്ഷിച്ചിട്ടുള്ള മൃതദേഹം ഇന്ന് രാവിലെ 11 മണിയോടെ സംസ്‌കരിക്കാനായി പൊലിസിന്റെ മേല്‍നോട്ടത്തില്‍ ഹരജിക്കാരനു വിട്ടുകൊടുക്കും. മലപ്പുറം ജില്ലാ പൊലിസ് സൂപ്രണ്ടിന്റെ മേല്‍നോട്ടത്തിലായിരിക്കും ഇത്.

മൃതദേഹം പൊതുദര്‍ശനത്തിനു വയ്ക്കരുതെന്നും സര്‍ക്കാരിനെതിരെ മുദ്രാവാക്യം മുഴക്കരുതെന്നും കോടതി നിര്‍ദേശിച്ചിരുന്നു. ശ്മശാനത്തിലേക്ക് എത്തിക്കുന്ന മൃതദേഹത്തില്‍ അന്തിമോപചാരം അര്‍പ്പിക്കാന്‍ ഹരജിക്കാര്‍ക്കും സുഹൃത്തുക്കള്‍ക്കും അജിതയുടെ ബന്ധുക്കള്‍ക്കും മതിയായ അവസരം നല്‍കണം. മൃതദേഹം സംസ്‌കരിക്കുന്ന നടപടികള്‍ സമാധാനപരമായിരിക്കണമെന്നും ഉത്തരവില്‍ പറയുന്നു.

അജിതയുടെ മൃതദേഹം വിട്ടുകിട്ടണമെന്നാവശ്യപ്പെട്ട് മധുര സ്വദേശിയായ അഭിഭാഷകന്‍ ഭഗവത്‌സിങാണ് ഹരജി നല്‍കിയത്.