കോഴിക്കോട്:  ദേശീയഗാനത്തെ അധിക്ഷേപിച്ചു ഫേസ്ബുക്കില്‍ പോസ്റ്റിട്ടെന്ന കേസില്‍ എഴുത്തുകാരനും നാടക പ്രവര്‍ത്തകനുമായ കമല്‍ സി ചവറയെ പൊലിസ് അറസ്റ്റു ചെയ്തു. കൊല്ലം കരുനാഗപ്പള്ളി പൊലിസ് രജിസ്റ്റര്‍ ചെയ്ത കേസില്‍ കോഴിക്കോട് നടക്കാവ് പൊലിസാണ് പെരിങ്ങളത്തെ ഭാര്യവീട്ടില്‍ നിന്നും കമലിനെ കസ്റ്റഡിയിലെടുത്തത്.  കൊല്ലം ചവറ സ്വദേശിയായ കമല്‍ മൂന്നു വര്‍ഷമായി കുന്ദമംഗലം പെരിങ്ങളത്ത് താമസിക്കുകയായിരുന്നു.
 ഇന്നലെ രാവിലെ കോഴിക്കോട് നോര്‍ത്ത് അസിസ്റ്റന്റ് കമ്മിഷണര്‍ ഇ.പി പൃഥ്വിരാജിന്റെ നേതൃത്വത്തിലുളള സംഘമാണ് കമലിനെ കസ്റ്റഡിയിലെടുത്തത്. വൈകിട്ട് ഏഴരയോടെ ദേഹാസ്വാസ്ഥ്യമനുഭവപ്പെട്ടതിനെ തുടര്‍ന്ന് പൊലിസ് അദ്ദേഹത്തെ ആശുപത്രിയില്‍ പ്രവേശിപ്പിച്ചു. കരുനാഗപള്ളി പൊലിസ് എത്തിയാണ് അറസ്റ്റു രേഖപ്പെടുത്തിയത്.
  'ശ്മശാനങ്ങളുടെ നോട്ടുപുസ്തകം' എന്ന നോവലിലെയും 'ശശിയും ഞാനും' എന്ന എഴുതിക്കൊണ്ടിരിക്കുന്ന നോവലിലെയും ചില ഭാഗങ്ങള്‍ കമല്‍ ഫേസ്ബുക്കില്‍ പോസ്റ്റ് ചെയ്തിരുന്നു. ഇതില്‍ ദേശീയഗാനത്തെ അധിക്ഷേപിക്കുന്ന പരാമര്‍ശങ്ങള്‍ ഉണ്ടെന്നാരോപിച്ച് ഐ.പി.സി 124 എ പ്രകാരം രാജ്യദ്രോഹകുറ്റം ചുമത്തിയാണ് കേസെടുത്തത്.  
  കഴിഞ്ഞ ദിവസം കൊല്ലത്തെ കമലിന്റെ കുടുംബ വീട്ടില്‍ പൊലിസ് റെയ്ഡ് നടത്തി നോവലും പെന്‍ഡ്രൈവും പിടിച്ചെടുത്തിരുന്നു.