പത്തനംതിട്ട: മണ്ഡല പൂജയ്ക്ക് ശബരിമലയിലെ അയ്യപ്പ വിഗ്രഹത്തില്‍ ചാര്‍ത്തുന്നതിനുള്ള തങ്ക അങ്കിയും വഹിച്ചുകൊണ്ടുള്ള ഘോഷയാത്ര ഇന്ന് രാവിലെ ഏഴിന് ആറന്മുള പാര്‍ഥസാരഥി ക്ഷേത്രത്തില്‍ നിന്നും പുറപ്പെടും.
ശബരിമലക്ഷേത്ര മാതൃകയില്‍ നിര്‍മിച്ച രഥത്തിലാണ് തങ്ക അങ്കി കൊണ്ടു പോകുന്നത്. 25ന് വൈകിട്ട് അഞ്ചിന് ശരംകുത്തിയിലെത്തുന്ന തങ്ക അങ്കിയെ ദേവസ്വം എക്‌സിക്യൂട്ടീവ് ഓഫിസര്‍ കെ. രവിശങ്കറിന്റെ നേതൃത്വത്തില്‍ സ്വീകരിച്ച് സന്നിധാനത്തേക്ക് ആനയിക്കും. തുടര്‍ന്ന് തന്ത്രി രാജീവര്, മേല്‍ശാന്തി ഉണ്ണികൃഷ്ണന്‍ നമ്പൂതിരി എന്നിവര്‍ ചേര്‍ന്ന് തങ്ക അങ്കി അയ്യപ്പ വിഗ്രഹത്തില്‍ ചാര്‍ത്തി ദീപാരാധന നടത്തും.
26ന് ഉച്ചയ്ക്ക് 11.55 നും ഒന്നിനും മധ്യേയാണ് മണ്ഡല പൂജ. 26ന് രാത്രി പത്തിന് നട അടയ്ക്കുന്നതോടെ മണ്ഡല പൂജാ ഉത്സവത്തിന് സമാപനമാകും. മകരവിളക്ക് ഉത്സവത്തിനായി 30ന് വൈകിട്ട് അഞ്ചിന് നട തുറക്കും.