കല്‍പ്പറ്റ: നോട്ട് അസാധുവാക്കലെന്ന പ്രധാനമന്ത്രി നരേന്ദ്രമോദിയുടെ വിഡ്ഢിത്തം നാടിന്റെ സര്‍വമേഖലയെയും തകര്‍ത്തുകൊണ്ടിരിക്കുകയാണെന്ന് കെ സുധാകരന്‍. ഡി.സി.സി പ്രസിഡന്റായി ഐ.സി ബാലകൃഷ്ണന്‍ ചുമതലയേറ്റ ചടങ്ങില്‍ സംസാരിക്കുകയായിരുന്നു അദ്ദേഹം. നോട്ട് അസുവാക്കല്‍ ബൂമറാങ് പോലെ മോദിയെ ചുറ്റുകയാണ്. ഭരണപരിഷ്‌ക്കാരമെന്ന പേരില്‍ ഏറ്റവും വലിയ വിഢിത്വം നടപ്പിലാക്കിയ പ്രധാനമന്ത്രിയായി മോദി മാറിക്കഴിഞ്ഞു. 50 ദിവസം കൊണ്ട് എല്ലാ പ്രശ്‌നങ്ങളും തീരുമെന്നായിരുന്ന മോദിയുടെ വാദം. ഇല്ലെങ്കില്‍ തന്നെ കത്തിച്ചോളൂ എന്നായിരുന്നു മോദി പറഞ്ഞത്. അങ്ങനെയെങ്കില്‍ വെറും ഒമ്പത് ദിവസം കഴിഞ്ഞാല്‍ അമ്പത് ദിവസം പൂര്‍ത്തിയാവുമെന്നും ഇതുവരെ പ്രശ്‌നത്തിന് പരിഹാരം കാണാന്‍ സാധിച്ചിട്ടില്ലെന്നും അദ്ദേഹം വ്യക്തമാക്കി.
വേണ്ടത്ര ഗൃഹപാഠമില്ലാതെ നടപ്പിലാക്കിയതാണ് നോട്ട് അസാധുവാക്കല്‍ ഒരു ദുരന്തമായി മാറാന്‍ കാരണം. 15.5 ലക്ഷം കറന്‍സികള്‍ പിന്‍വലിക്കുമ്പോള്‍ അത്രയും തന്നെ അടിച്ചിറക്കണമായിരുന്നു. എന്നാല്‍ ഇപ്പോള്‍ നോട്ടടിക്കാന്‍ കടലാസും മഷിയുമില്ലാത്ത അവസ്ഥയാണെന്നും അദ്ദേഹം പരിഹസിച്ചു. ഏതൊരു പ്രസ്ഥാനത്തിനും കാലം നല്‍കുന്ന പരുക്കുകളുണ്ട്. എന്നാല്‍ അത് മാറ്റിയെടുക്കാന്‍ സാധിക്കുന്നതാണ്. കോണ്‍ഗ്രസിന്റെ തട്ടകമായ വയനാട്ടില്‍ പാര്‍ട്ടിയെ പൂര്‍വപ്രതാപത്തിലെത്തിക്കാന്‍ ഐ.സി ബാലകൃഷ്ണന്റെ നേതൃപാടവത്തിന് സാധിക്കട്ടെയെന്നും അദ്ദേഹം ആശംസിച്ചു.