കാസര്‍കോട്: ചീമേനിയില്‍ നടത്തിയ അക്രമത്തിലൂടെ ആയുധം താഴെവെക്കാന്‍ സി.പി.എം ഒരുക്കമല്ലെന്നു വീണ്ടും തെളിയിച്ചിരിക്കുകയാണെന്നു ബി.ജെ.പി ദേശിയ നിര്‍വാഹക സമിതിയംഗം പി.കെ കൃഷ്ണദാസ്. കാസര്‍കോട് പ്രസ്‌ക്ലബില്‍ നടന്ന വാര്‍ത്താസമ്മേളനത്തില്‍ സംസരിക്കുകയായിരുന്നു അദ്ദേഹം. പൊലിസ് അനുമതിയോടെ നടത്തിയ ഈ അക്രമം കമ്മ്യൂണിസ്റ്റ് പാര്‍ട്ടിയുടെ ഫാസിസ്റ്റ് സ്വഭാവം തെളിയിക്കുന്നതാണെന്നും അദ്ദേഹം ആരോപിച്ചു.
എസ്.സി എസ്.ടി മോര്‍ച്ചാ സംസ്ഥാന പ്രസിഡന്റ് പി സുധീര്‍ കുമാര്‍, ജില്ലാ പ്രസിഡന്റ് എ.കെ കയ്യാര്‍, എം ഭാസ്‌കരന്‍, എ.വി ധനീശ് അടക്കമുള്ള പ്രവര്‍ത്തകരെ അക്രമിച്ചതിലൂടെ പ്രദേശത്ത് മറ്റു സംഘടനകള്‍ക്കുള്ള പ്രവര്‍ത്തന സ്വാതന്ത്ര്യം നിഷേധിക്കുകയാണ്. പൊലിസ് സാന്നിധ്യത്തില്‍ നടത്തിയ ആക്രമണം സി.പി.എം ജില്ലാ നേതൃത്വവും ഉന്നത പൊലിസ് ഉദ്യോഗസ്ഥരും ചേര്‍ന്നു നടത്തിയ ഗൂഢാലോചനയുടെ ഭാഗമാണെന്നു സംശയിക്കുന്നതായും കൃഷ്ണദാസ് ആരോപിച്ചു.
വാര്‍ത്താസമ്മേളനത്തില്‍ ജില്ലാ ജനറല്‍ സെക്രട്ടറി എ വേലായുധന്‍, പി രമേശ്, ബിജു എളക്കുഴി, കെ രഞ്ചിത്ത് സംബന്ധിച്ചു.